ესპანეთში ჩატარებულმა ორწლიანმა გამოძიებამ გამოავლინა ჯგუფი, რომელიც ლატვიიდან, ლიეტუვიდან, პოლონეთიდან, სლოვაკეთიდან და უნგრეთიდან შეტანილ კონტრაფაქციულ საწვავს ესპანეთის რამდენიმე რეგიონის „იაფფასიან“ ბენზინგასამართ სადგურებს აწვდიდა. ამ ინფორმაციას ესპანური მედია სამოქალაქო გვარდიაზე (Guardia Civil) დაყრდნობით ავრცელებს.
ოპერაცია „ტენკი“ 2023 წელს, მურსიის პროვინციაში, ლა-ოხას-დელ-კამპოს მცხოვრებლების საჩივრების შემდეგ დაიწყო, რომლებიც საწვავის ცისტერნების უწყვეტი მოძრაობის გამო იყვნენ შეწუხებულნი.
ადგილობრივმა სამართალდამცავებმა აღმოაჩინეს არალეგალური საწვავის საწყობი, რომელშიც 70 000 ლიტრზე მეტი დიზელის საწვავი ინახებოდა, ასევე სხვადასხვა აღჭურვილობა, შესანახი ავზები და ქიმიკატები, რომელთა გამოყენება საავტომობილო დიზელის საწვავში აკრძალულია.
მოგვიანებით დადგინდა, რომ საწყობში არსებული დიზელის საწვავი „სუფთა“ არ იყო და გადასახადებისგან თავის ასარიდებლად, მას ფიზიკური თვისებების შემცვლელი დანამატები ჰქონდა შერეული.
მოდიფიცირებული საწვავი განკუთვნილი იყო მურსიის, ალმერიის, ალიკანტესა და ვალენსიის ე.წ. „იაფფასიანი“ ბენზინგასამართი სადგურებისთვის. მოგვიანებით, რეიდებმა კიდევ ორი არალეგალური საწყობი გამოავლინა.
ზეთად და საპოხ მასალად დეკლარირებული საწვავი
ესპანეთის ხელისუფლებამ დაადგინა, რომ აღმიშნული საწვავი ქვეყანაში ლატვიიდან, პოლონეთიდან, სლოვაკეთიდან, უნგრეთიდან და ლიეტუვიდან შედიოდა. საბაჟო შემოწმებისა და აქციზური გადასახადებისთვის თავის ასარიდებლად, ის ზეთად და საპოხ მასალად იყო დეკლარირებული და არა დიზელის საწვავად.
ამ გზით, დამნაშავეთა ქსელი თავს არიდებდა ესპანეთში არსებულ ნახშირწყალბადების სპეციალურ გადასახადს, ასევე დამატებითი ღირებულებისა და მოგების გადასახადის ვალდებულებებს. ოფიციალური პირების თქმით, სქემამ არა მხოლოდ სახელმწიფო ხაზინა დააზარალა, არამედ არაკეთილსინდისიერი კონკურენცია შეუქმნა ლეგიტიმურ ბიზნესებს.
გამოძიების ფარგლებში სულ 18 ადამიანია დაკავებული, კიდევ 14 ეჭვმიტანილის მიმართ გამოძიება გრძელდება, ასევე იდენტიფიცირებულია 40 კომპანია, რომლებიც, შესაძლოა, თაღლითობაში იყვნენ ჩართული.
ჯგუფი იყენებდა ე.წ. „ფიქტიურ კომპანიებს“, რომლებიც არასტაბილურ და მძიმე ფინანსურ მდგომარეობაში მყოფი პირების ჩართულობით იქმნებოდა. ბევრი ადამიანი, ვინც თავიანთი იდენტობის გამოყენების ნებართვისთვის კომპენსაციას იღებდა, უცხოელი, მაგალითად, უკრაინის, ლატვიისა და საფრანგეთის მოქალაქე იყო. თუმცა, საქმეში ესპანეთის მოქალაქეებიც ფიგურირებენ.
დაკავებულებს ბრალი ედებათ თაღლითობაში, დოკუმენტების გაყალბებაში, გადასახადებისგან თავის არიდებაში, ფულის გათეთრებაში, საგზაო მოძრაობის უსაფრთხოების დარღვევასა და დანაშაულებრივ ორგანიზაციაში საქმიანობაში.
გამომძიებლებმა ამ დრომდე ქსელთან დაკავშირებული 11 ბენზინგასამართი სადგური და ბიზნესი შეამოწმეს. გამოძიება საქმეზე, სახელწოდებით „ოპერაცია ტენკი“, გრძელდება.