საფრანგეთის ყოფილმა პრეზიდენტმა, ნიკოლა სარკოზიმ განაცხადა, რომ ის უდანაშაულოა. სარკოზის თქმით, ის შეღავათებს არ ითხოვს, რადგან დარწმუნებულია, რომ სიმართლე გაიმარჯვებს. ამის შესახებ ნათქვამია სარკოზის მიერ სასჯელის აღსრულების დაწყებამდე ცოტა ხნით ადრე სოციალურ ქსელ X-ში გამოქვეყნებულ განცხადებაში.
ნიკოლა სარკოზიმ პარიზის ლა სანტეს ციხეში სასჯელის მოხდა დღეიდან დაიწყო.
„მინდა, ვუთხრა მათ (ფრანგ ხალხს) მთელი ჩემი ურყევი ძალით, რომ ამ დილით დააპატიმრეს არა ყოფილი პრეზიდენტი, არამედ უდანაშაულო კაცი“, – აღნიშნავს ნიკოლა სარკოზი თავის განცხადებაში.
პარიზის სასამართლომ 25 სექტემბერს ნიკოლა სარკოზი დამნაშავედ ცნო დანაშაულებრივ შეთქმულებაში, მუამარ კადაფისგან მილიონობით ევროს უკანონო დაფინანსების მიღების მცდელობის საქმის ფარგლებში. ამასთან, სასამართლომ იგი სხვა ბრალდებებში, მათ შორის კორუფციაში მონაწილეობისა და საარჩევნო კამპანიის უკანონო დაფინანსების საქმეებზე გაამართლა. სარკოზის ადვოკატებმა სასამართლოს გადაწყვეტილება გაასაჩივრეს და სააპელაციო სასამართლოში ყოფილი პრეზიდენტის გათავისუფლების შუამდგომლობა დააყენეს. სააპელაციო სასამართლოს საქმის შესასწავლად ორთვიანი ვადა აქვს.
„მე გავაგრძელებ ამ უკანონო სკანდალის დაგმობას, ამ მძიმე გზის, რომელსაც 10 წელზე მეტია, გავდივარ. ეს არის უკანონო დაფინანსების საქმე ყოველგვარი დაფინანსების გარეშე. ხანგრძლივი სამართლებრივი პროცესი დაიწყო დოკუმენტის საფუძველზე, რომლის სიყალბეც ახლა დადგენილია“, – ნათქვამია სარკოზის განცხადებაში.
ყოფილი პრეზიდენტი მის წინააღმდეგ სასამართლო საქმეს შურისძიებას უწოდებს.
„ამ დილით მე ვგრძნობ ღრმა ტკივილს საფრანგეთის გამო, რომელიც აღმოჩნდა დამცირებული შურისძიების გამოხატულებით, რომელმაც სიძულვილი არნახულ დონეზე აიყვანა. მე ეჭვი არ მეპარება, სიმართლე გაიმარჯვებს, თუმცა საფასური დამანგრეველი იქნება“, – აღნიშნავს საფრანგეთის ექსპრეზიდენტი.
— Nicolas Sarkozy (@NicolasSarkozy) October 21, 2025