უკრაინის პრეზიდენტს, ვოლოდიმირ ზელენსკისა და ესპანეთის პრემიერ-მინისტრს, პედრო სანჩესს შორის სატელეფონო საუბარი შედგა. ინფორმაციას თავად ვოლოდიმირ ზელენსკი ავრცელებს.
ზელენსკის განცხადებით, მხარეებმა რუსული დარტყმების შედეგად დაზიანებული ენერგეტიკული სექტორის აღდგენის კუთხით უკრაინის საჭიროებები განიხილეს და ქვეყნის მხარდასაჭერად გადასადგმელ ახალ ნაბიჯებზე შეთანხმდნენ.
„ესპანეთის პრემიერ-მინისტრთან, პედრო სანჩესთან ჩვენი ენერგეტიკის სექტორის აღდგენის საჭიროებები განვიხილე. მადლიერი ვარ ჩვენს დასახმარებლად მისი მზადყოფნისთვის. ჩვენ შევთანხმდით შეხვედრაზე და ახალ ნაბიჯებზე, რათა მხარი დავუჭიროთ ჩვენს სახელმწიფოს, უკრაინელებს და საერთო უსაფრთხოებას ევროპაში“, – განაცხადა ვოლოდიმირ ზელენსკიმ ყოველდღიურ ვიდეომიმართვაში.
მისივე თქმით, მხარეებმა განიხილეს ზომები, რამაც უკრაინის თავდაცვა, შესაძლოა, მნიშვნელოვნად გააძლიეროს.
ამასთან, როგორც უკრაინის პრეზიდენტმა აღნიშნა, რუსეთს დაუსჯელობის შეგრძნება არ უნდა ჰქონდეს და კიდევ ერთხელ გაუსვა ხაზი რუსეთის წინააღმდეგ მიმართული სანქციების მე-19 პაკეტის აუცილებლობას.