პრეზიდენტი ტრამპი ცდილობს იპოვოს გზები, რათა გააგრძელოს ზეწოლა პუტინზე, და სიმართლე გითხრათ, გააგრძელოს ზეწოლა ზელენსკიზეც, – განაცხადა ნატოში აშშ-ის ელჩმა, მეთიუ უიტაკერმა ტელეკომპანია NEWSMAX-თან ინტერვიუში.
უიტაკერმა ხაზგასმით აღნიშნა, რომ მიუხედავად ადმინისტრაციის მზაობისა, დაეხმაროს უკრაინას სუვერენიტეტის დაცვაში, ტრამპის მთავარი აქცენტი გადავიდა იმაზე, რომ ზეწოლის გზით აიძულოს როგორც მოსკოვი, ასევე კიევი მოლაპარაკებები დაიწყონ.
„ეს არის სასტიკი პოზიციური ომი, რომელშიც გამარჯვებული არავინაა. პრეზიდენტი ტრამპი ცდილობს მოძებნოს გზები, რომ გააგრძელოს ზეწოლა პუტინზე, სიმართლე რომ ვთქვათ, ზელენსკიზეც, და ასევე ეძებს ახალ მექანიზმებს, რათა ზეწოლის გზით აიძულოს ორივე მხარე, მოლაპარაკებების მაგიდასთან დაჯდნენ, მიაღწიონ ცეცხლის შეწყვეტას, დაასრულონ ომი და, უბრალოდ, შეწყვიტონ ეს სისხლისღვრა“, – აღნიშნა მან.
ელჩის თქმით, ტრამპის განცხადება რუსეთის წინააღმდეგ სანქციების შესახებ იყო „ყველაზე არსებითი შედეგი“, რომელიც ნატოს გენერალურ მდივანთან შეხვედრამ დადო.
უიტაკერის განცხადებით, ბოლო 10 თვის მანძილზე, განუზომელი დანაკარგების მიუხედავად, რუსეთს ბრძოლის ველზე მინიმალური პროგრესი ჰქონდა.