რუსეთის ხელისუფლებამ სახელმწიფო სათათბიროს წარუდგინა კანონპროექტი, რომელიც თავდაცვის სამინისტროს უფლებას მისცემს სამობილიზაციო რეზერვში მყოფი მოქალაქეები გაიწვიოს, რათა მათ ქვეყნის ტერიტორიაზე მდებარე ობიექტები დრონებისგან დაიცვან. ინფორმაციას The Moscow Times-ი ავრცელებს.
კანონპროექტი ითვალისწინებს რეზერვისტების გაგზავნას „კრიტიკული და სასიცოცხლოდ მნიშვნელოვანი ობიექტების დასაცავად“.
რუსეთის შეიარაღებული ძალების გენერალური შტაბის საორგანიზაციო-სამობილიზაციო მთავარი სამმართველოს ხელმძღვანელის ვლადიმერ ციმლიანსკის განცხადებით, კანონპროექტში საუბარი არ არის მობილიზაციაზე. ის შეეხება მხოლოდ იმ მოქალაქეებს, რომლებმაც სარეზერვო სამსახურთან ნებაყოფლობით გააფორმეს კონტრაქტი.
მისი თქმით, რეზერვისტებს უკრაინასთან ომში არ გაიწვევენ. „მოქმედი კანონმდებლობის თანახმად, რეზერვისტებით დაკომპლექტებული ქვედანაყოფების გამოყენება შესაძლებელია მხოლოდ სამობილიზაციო პერიოდში ან საომარი მდგომარეობის დროს, მაშინ როცა ახალი დოკუმენტი მათ გამოყენებას მშვიდობიან დროს ითვალისწინებს“, – ციტირებს გამოცემა ციმლიანსკის.