„ფრანს პრესის“ ცნობით, ძირითადი პალესტინური ფრაქციები, მათ შორი ტერორისტული დაჯგუფება „ჰამასი”, თანხმობას აცხადებენ, ღაზის სექტორში მმართველობა ტექნოკრატების კომიტეტს გადასცენ. შესაბამისი შეთანხმება პალესტინური ძალების წარმომადგენლებს შორის კაიროში გამართულ შეხვედრაზე იყო მიღწეული.
როგორც მოლაპარაკებების შემდეგ გამოქვეყნებულ განცხადებაშია აღნიშნული, „დამოუკიდებელი ტექნოკრატებისგან შემდგარი დროებითი პალესტინური კომიტეტი“ დაკავებული იქნება „საბაზისო სერვისების უზრუნველყოფით, არაბ ძმებთან და საერთაშორისო ინსტიტუტებთან თანამშრომლობით”.
განცხადებაში ასევე აღნიშნულია, რომ პალესტინური ფრაქციები იმუშავებენ საერთო პოზიციის შემუშავებაზე „გამოწვევებთან გასამკლავებლად”. გავრცელებული ცნობებით, კაიროში გამართულ შეხვედრას დაესწრო ეგვიპტის დაზვერვის ხელმძღვანელი ჰასან რაშადიც.
ეგვიპტეში დაჯგუფება „ჰამასის“ წევრები ასევე შეხვდნენ პალესტინის ეროვნულ გამათავისუფლებელი მოძრაობის „ფატჰის” წარმომადგენლებს. ამ მოლაპარაკებებზე განიხილებოდა ღაზის სექტორში ცეცხლის შეწყვეტის გეგმის მეორე ფაზა.