ესპანეთის პოლიციამ 20 ტონა ნარკოტიკი ამოიღო და 20 ადამიანი დააკავა. დაკავებულები ეჭვმიტანილნი არიან ნარკოტრეფიკინგის ორი ქსელის კუთვნილობაში.
20 ტონა მარიხუანა მწვანე წიწაკის ყუთების ქვეშ არსებულ საიდუმლო განყოფილებებში იყო გადამალული.
აკრძალული ტვირთი წიწაკით სავსე ორ რეფრეჟერატორით მაროკოდან ესპანეთში გადაჰქონდათ.
ორივე სატვირთო ავტომობილი ესპანეთის სამხრეთით, ევროპაში ერთ-ერთი უდიდეს პორტ ალხესირასისკენ მიემართებოდა.
„სატვირთო მანქანები, რომლებიც ჩრდილოეთ მაროკოდან, ტანჟერიდან გამოემგზავრნენ, კადისსა და გრანადაში გააჩერეს. მათი დაკავების დროს, ნარკოტიკების გადანაწილება მიმდინარეობდა“, – ნათქვამია ესპანეთის პოლიციის განცხადებაში, რომელსაც სააგენტო „ფრანს პრესი“ ციტირებს.
20 ტონა მარიხუანის ამოღება ესპანეთის სამოქალაქო გვარდიის მიერ მაროკოს ეროვნული უსაფრთხოების გენერალურ დირექტორატთან ერთად ჩატარებული ოპერაციის შედეგად განხორციელდა.
„20 დაკავებული პირი წინასწარ პატიმრობაში იმყოფება. მათ ნარკოტიკებით ვაჭრობა და კრიმინალური ორგანიზაციის წევრობა ედებათ ბრალად“, – აცხადებს ესპანეთის პოლიცია.
ასევე ამოღებულია რამდენიმე ავტომობილი და 7000 ევროზე მეტი ოდენობის ნაღდი ფული.