უკრაინაში კორუფციულ სკანდალს სოციალურ ქსელში უნგრეთის საგარეო საქმეთა მინისტრი პიტერ სიიარტო გამოეხმაურა.
როგორც უნგრეთის პირველმა დიპლომატმა დაწერა, უკრაინაში კორუფცია მძვინვარებს. ბრიუსელი სულ უფრო მეტ ფულს აძლევს კიევს, თუმცა ჯერ არავის უნახავს ევროკავშირიდან მიღებული თანხის ხარჯვის ზუსტი აღრიცხვა.
„ბრიუსელი წლების განმავლობაში აფინანსებდა უკრაინის სახელმწიფოს ევროპელი ხალხის ფულით. ამასობაში, უკრაინაში კორუფცია მძვინვარებს, გასაკვირი არ არის, რომ ჯერ არავის უნახავს ევროკავშირიდან მიღებული თანხის ხარჯვის ზუსტი აღრიცხვა. და ამასობაში, რა სურს ბრიუსელს? კიდევ უფრო მეტი ფულის გაგზავნა უკრაინაში, პრეზიდენტ ზელენსკისთან, რომლის ახლო გარემოცვაშიც ცოტა ხნის წინ დიდი კორუფციული ქსელი გამოვლინდა. დროა, შევაჩეროთ ეს სიგიჟე, უნდა შევწყვიტოთ ევროპელი ხალხის ფულის გაგზავნა უკრაინაში! სანამ ჩვენ ვართ მთავრობაში, უნგრელ ხალხს შეუძლია დარწმუნებული იყოს: უნგრელი ხალხის ფული უკრაინაში არ წავა! ბრიუსელში დაფუძნებული, უკრაინასთან მოკავშირე მთავრობის შემთხვევაში, სიტუაცია, რა თქმა უნდა, განსხვავებული იქნებოდა“ – აცხადებს სიიარტო.
ცნობისთვის, 10 ნოემბერს უკრაინის ეროვნულმა ანტიკორუფციულმა ბიურომ მასშტაბური კორუფციული საქმის გახსნის შესახებ გაავრცელა ინფორმაცია. საქმე ეხება უკრაინის სახელმწიფო კომპანიის „ენერგოატომის“ თანხების გაფლანგვას. სამართალდამცველებმა რამდენიმე ადამიანის სახლში ჩხრეკა ჩაატარეს. ჩხრეკა ჩატარდა იუსტციის მინისტრის გერმან გალუშენკოს სახლშიც, რომელიც იუსტიციის მინისტრის თანამდებობის დაკავებამდე ქვეყნის ენერგეტიკის მინისტრის პოსტს იკავებდა.
სისხლის სამართლის საქმის ფიგურანტი აგრეთვე არის უკრაინის პრეზიდენტის ვოლოდიმირ ზელენსკის ახლო მეგობარი თემურ მინდიჩი, რომელმაც ქვეყანა უკვე დატოვა. გუშინ გალუშენკომ და უკრაინის ენერგეტიკის მინისტრმა სვეტლანა გრინჩუკმა გადადგომის შესახებ განცადებები დაწერეს.