თურქეთის ხელისუფლების გადაწყვეტილებით, C-130 ტიპის სამხედრო სატრანსპორტო თვითმფრინავების ფრენები დროებით შეჩერდება. ინფორმაციას ამის შესახებ „ევრონიუსი“ ავრცელებს.
როგორც ტელეკომპანია წერს, ეს გადაწყვეტილება თურქეთის მთავრობამ საქართველოს ტერიტორიაზე მომხდარი ავიაკატასტროფის შემდეგ მიიღო, რასაც 20 სამხედროს სიცოცხლე ემსხვერპლა.
თურქეთის თავდაცვის სამინისტროს ცნობით, C- 130-ის ტიპის თვითმფრინავებს დეტალური ტექნიკური ინსპექტირება ჩაუტარდებათ. უწყების განცხადებაში აღნიშნულია, რომ ფრენების განახლებას მხოლოდ ის თვითმფრინავები შეძლებენ, რომლებიც შემოწმებას წარმატებით გაივლიან.
ამერიკაში დამზადებული С-130 ჰერკულესის ტიპის სატრანსპორტო თვითმფრინავებს თურქეთის შეიარაღებული ძალები ფართოდ იყენებენ პერსონალის გადასაყვანად და ლოგისტიკური ოპერაციებისთვის.
„ევრონიუსის“ ცნობით, 11 ნოემბერს მომხდარი ავიაკატასტროფის მიზეზები ჯერ დადგენილი არ არის და გამოძიება გრძელდება.
საქართველოს ტერიტორიაზე ჩამოვარდნილი თვითმფრინავი თურქეთმა 2012 წელს საუდის არაბეთისგან შეისყიდა და რემონტის შემდეგ მისი გამოყენება 2014 წლიდან დაიწყო. თურქეთის თავდაცვის სამინისტროს ცნობით, თვითმფრინავმა ტექნიკური უზრუნველყოფის სამუშაოების ბოლოს 12 ოქტომბერს გაიარა.
სატრანსპორტო თვითმფრინავი აზერბაიჯანიდან თურქეთში მიფრინავდა და საქართველოს ტერიტორიაზე ჩამოვარდა. ბორტზე იმყოფებოდნენ სამხედროები, რომლებიც თურქული „ეფ-16“-ის ტიპის ავიაგამანადგურებლების მომსახურებას უზრუნველყოფდნენ. ისინი აზერბაიჯანში გამარჯვების დღის აღსანიშნავ ღონისძიებაზე იმყოფებოდნენ.
დაღუპულთა დაკრძალვა მას შემდეგ გაიმართება, რაც მათ ცხედრებს თურქეთში გადაასვენებენ და დასრულდება სამედიცინო ექსპერტიზა.