უკრაინის პრეზიდენტის ოფისის მრჩეველი მიხაილო პოდოლიაკი ქვეყანაში მიმდინარე კორუფციულ სკანდალს გამოეხმაურა და აღნიშნა, რომ ეს რუსეთის ბრალია.
„ამბავი ენერგეტიკის სექტორში კორუფციული სქემის გამოძიების შესახებ, სამწუხაროდ, მოულოდნელი არ არის. ეს არის წარსულის ლოგიკური გამოძახილი, როდესაც კრემლი ათწლეულების განმავლობაში აშენებდა სისტემას, რათა უკრაინა მისი გავლენის სფეროში მოექცია. კორუფცია ამის მთავარი ინსტრუმენტი იყო და ეს მექანიზმები დღემდეა შემორჩენილი. თუმცა, დღევანდელი სიტუაცია პრინციპულად განსხვავებულია“, – დაწერა პოდოლიაკმა სოციალურ ქსელ X-ში.
უკრაინის პრეზიდენტის ოფისის მრჩევლის აზრით, მნიშვნელოვანია, რომ უკრაინაში 2014 წლიდან დამოუკიდებელი ანტიკორუფციული უწყებები თავიანთ საქმეს აკეთებენ. „გამოძიების დაწყების, მასშტაბური საგამოძიებო ღონისძიებების ჩატარების თავად ფაქტი ხაზს უსვამს სამართლიანი ვერდიქტების აუცილებლობას ყველაზე მაღალ დონეზე – ყველაფერი უკრაინის ტრანსფორმაციის დემონსტრაციაა“, – დასძინა მან.
პოდოლიაკის თქმით, რა თქმა უნდა, რუსული პროპაგანდა შეეცდება გამოიყენოს შექმნილი ვითარება, რათა თქვას, რომ უკრაინა ქმედით უუნაროა, თუმცა ეს ასე არ არის.
„რეალობა საპირისპიროა: ჩვენ არა სახელმწიფოს ჩამოშლას, არამედ მისი ახალი ინსტიტუციური საფუძვლების გამოცდას ვუყურებთ. ცოტა ქვეყანა მოიძებნება, რომელიც საომარი მდგომარეობის დროს გამოავლენს, გამოიძიებს და საჯაროდ განიხილავს მსგავს შემთხვევებს“, – დაწერა მან.
პოდოლიაკის მტკიცებით, უკრაინა ევროკავშირის გზაზე რთულ, მტკივნეულ, მაგრამ აბსოლუტურად აუცილებელ ნაბიჯებს დგამს.