გერმანიის კანცლერმა, ფრიდრიხ მერცმა უკრაინის პრეზიდენტს, ვოლოდიმირ ზელენსკის მოუწოდა, უზრუნველყოს, რომ უკრაინელი ახალგაზრდა მამაკაცები გერმანიაში დიდი რაოდენობით არ ჩავიდნენ. „როიტერის“ ინფორმაციით, ამის შესახებ მერცმა ზელენსკის „ხანგრძლივი“ სატელეფონო საუბრის დროს განუცხადა.
„ისინი იქ არიან საჭირონი. მე ვთხოვე უკრაინის პრეზიდენტს, უზრუნველყოს, რომ უკრაინელი ახალგაზრდები, კერძოდ, დიდი რაოდენობით არ ჩამოვიდნენ გერმანიაში და სამშობლოში იმსახურონ“, – განაცხადა გერმანიის კანცლერმა.
ევროსტატის მონაცემებით, სექტემბერში ევროკავშირის ქვეყნებში კიდევ 79 205 უკრაინელი ლტოლვილი დაფიქსირდა, რაც 2023 წლის აგვისტოდან ყველაზე მაღალი ყოველთვიური მაჩვენებელია. სააგენტოს მონაცემებით, გერმანიაში ამჟამად 1.2 მილიონზე მეტი უკრაინელი ლტოლვილი იმყოფება, რაც ევროკავშირში მყოფი უკრაინელი ლტოლვილების 28.3%-ს შეადგენს.
როგორც „როიტერი“ წერს, გერმანიის მთავრობა ასევე გეგმავს უკრაინელი ლტოლვილებისთვის გაცემული შეღავათების კორექტირებას, რათა „მუშაობის სტიმული აჭარბებდეს სოციალური უზრუნველყოფის სისტემაში დარჩენის სტიმულს“. გერმანიის მთავრობის პრესსპიკერის თქმით, სატელეფონო საუბრის დროს მერცმა ასევე ახსენა უკრაინაში არსებული ენერგეტიკული სკანდალი.