ევროკომისიის პრეზიდენტი ურსულა ფონ დერ ლაიენი აცხადებს, რომ ნებისმიერმა „სანდო“ სამშვიდობო გეგმამ, გარდა იმისა, რომ „უნდა შეაჩეროს მკვლელობა“, ასევე „არ უნდა დათესოს მომავალი კონფლიქტის თესლი“.
თავის განცხადებაში, ის ხაზს უსვამს სამ ძირითად ელემენტს, რომელთა ჩართვაც კომისიას რუსეთსა და უკრაინას შორის შეთანხმებაში სურს:
არ შეიძლება, უკრაინის საზღვრები ძალის გამოყენებით შეიცვალოს;
არავითარი შეზღუდვა უკრაინის შეიარაღებულ ძალებზე, რაც ქვეყანას „მომავალი თავდასხმის წინაშე დაუცველს“ დატოვებს;
ევროკავშირის „ცენტრალური როლი“ უკრაინისთვის მშვიდობის უზრუნველყოფაში „სრულად უნდა იყოს ასახული“, უკრაინა კი „საბოლოოდ ჩვენს კავშირში გაწევრიანდება“.
ფონ დერ ლაიენმა ასევე გააჟღერა მოწოდება რუსეთის მიერ გატაცებული „თითოეული უკრაინელი ბავშვის“ დაბრუნების შესახებ და განაცხადა, რომ „ათობით ათასი ბიჭი და გოგო ხაფანგში რჩება“.
ახალი სამშვიდობო გეგმის შესახებ ცნობილი 19 ნოემბერს, გამოცემა Axios-ის პუბლიკაციიდან გახდა, მოგვიანებით კი პრესაში მისი დეტალები გაჩნდა. ამ დეტალების თანახმად, შეთავაზებულია უკრაინის შეიარაღებული ძალების რაოდენობის შეზღუდვა 600 ათასამდე, ნაცვლად ამჟამინდელი 800-850 ათასისა. გეგმა ასევე ითვალისწინებს, რომ ზაპოროჟიეს ატომური ელექტროსადგური ატომური ენერგიის საერთაშორისო სააგენტოს მეთვალყურეობის ქვეშ გადავა, ხოლო მის მიერ გამომუშავებული ელექტროენერგია რუსეთსა და უკრაინას შორის თანაბრად გადანაწილდება. გეგმაში ნათქვამი იყო, რომ ხერსონისა და ზაპოროჟიეს ოლქებში საზღვარი კონტაქტის ხაზის გასწვრივ გაიყინებოდა.
აშშ-ის პრეზიდენტმა დონალდ ტრამპმა აღნიშნა, რომ უკრაინისთვის შეთავაზებული ამჟამინდელი სამშვიდობო გეგმა საბოლოო წინადადება არ არის.