შეერთებული შტატების სახელმწიფო მდივანმა მარკო რუბიომ განაცხადა, რომ ჟენევაში უკრაინის დელეგაციასთან ომის შეწყვეტის გეგმის განხილვაზე მნიშვნელოვან პროგრესს მიაღწია.
„ვფიქრობ, ამ შეხვედრის მთავარი დასკვნა არის ის, რომ ის ძალიან ძალიან მნიშვნელოვანი იყო და [საუკეთესო] დღე, რაც კი გვქონია ამ მთელი პროცესის განმავლობაში იმ მომენტის [ახალი ადმინისტრაციის მოსვლის] შემდეგ,”– განუცხადა რუბიომ ჟურნალისტებს.
მან ასევე აღნიშნა, რომ მოლაპარაკებები გაგრძელდება, მაგრამ დეტალები არ დაუსახელებია.
უკრაინის პრეზიდენტის ოფისის ხელმძღვანელი ანდრეი ერმაკი, რომელიც უკრაინის დელეგაციას ხელმძღვანელობს, ასევე აცხადებს, რომ დღევანდელი შეხვედრა პროდუქტიული იყო.
„ჩვენ მნიშვნელოვან პროგრესს მივაღწიეთ და წინ მივიწევთ სამართლიანი და მდგრადი მშვიდობისკენ, რომელსაც იმსახურებს უკრაინელი ხალხი”, – განაცხადა ერმაკმა.
ამასთან, მედიის ცნობით, ერმაკმა აღნიშნა, რომ დღესვე დელეგაციების მეორე შეხვედრაც გაიმართება.
უკრაინის, აშშ-ის და ევროპელი მოკავშირეების დელეგაციებმა ჟენევაში სამშვიდობო გეგმასთან დაკავშირებით მოლაპარაკებები დღეს დაიწყეს.