ჩინეთის საგარეო საქმეთა მინისტრი ვანგ ი აცხადებს, რომ იაპონიის პრემიერ-მინისტრის მხრიდან ტაივანთან დაკავშირებით გაკეთებული განცხადებები „შოკის მომგვრელია“.
ჩინეთის საგარეო საქმეთა სამინისტროს განცხადების თანახმად, ვანგმა აღნიშნა, რომ იაპონია კვეთს წითელ ხაზს, რომელსაც ხელი არ უნდა შეეხოს. მან იაპონიის პრემიერ-მინისტრი სანაე ტაკაიჩი ტაივანში სამხედრო ჩარევის მცდელობაში დაადანაშაულა.
პარალელურად, იაპონიის საგარეო საქმეთა სამინისტრო აცხადებს, რომ ჩინეთის პრეტენზიები „სრულიად მიუღებელია“ და აღნიშნავს, რომ იაპონიის მშვიდობისადმი ერთგულება უცვლელი დარჩა.
ცნობისთვის, ორ ქვეყანას შორის ურთიერთობა მას შემდეგ დაიძაბა, რაც იაპონიის პრემიერ-მინისტრმა, სანაე ტაკაიჩიმ რამდენიმე დღის წინ განაცხადა, რომ ჩინეთის მხრიდან ტაივანზე თავდასხმამ, შესაძლოა, იაპონიის მხრიდან სამხედრო რეაგირება გამოიწვიოს. ქვეყნებს შორის დაპირისპირების ფონზე ჩინეთმა იაპონური ზღვის პროდუქტების იმპორტის აკრძალვის გადაწყვეტილება მიიღო. ამასთან, ჩინეთმა საკუთარ მოქალაქეებს მოუწოდა, იაპონიაში მოგზაურობისგან თავი შეიკავონ. პარალელურად, იაპონიამ ჩინეთში მყოფი თავისი მოქალაქეები გააფრთხილა, გააძლიერონ უსაფრთხოების ზომები და თავი აარიდონ ხალხმრავალ ადგილებს.