უპირველეს ყოვლისა, მე კვლავ გავიმეორებდი იმ სიტყვებს, რომლებიც ბიძინა ივანიშვილის ადვოკატებმა გამოიყენეს ამ დავის და მთლიანად პროცესის შესაფასებლად, როდესაც ის შეაფასეს როგორც ავაზაკური რეკეტი და ყაჩაღობა, – განუცხადა ბულგარეთში ქართველ ჟურნალისტებს საქართველოს პარლამენტის თავმჯდომარე შალვა პაპუაშვილმა.
შალვა პაპუაშვილის თქმით, ეს დღეს დაადასტურა ლონდონის უზენაესმა სასამართლომ.
„მეორე, რაც დაადასტურა დღეს სასამართლომ, არის ის, რომ ის წესები, რომლებიც მათ შორის საბანკო-საფინანსო სისტემაში არსებობს ევროპის კონტინენტზე, ეს წესები ძალიან ადვილად ირღვევა, როდესაც არაფორმალური მმართველობა ერევა ხოლმე ასეთ პროცესებში. ჩვენ ვნახეთ, რამდენიმე წელია ეს დავა მიმდინარეობს და ვნახეთ როგორ თავხედურად, უხეშად, ისტორიულად და ზოგადად, მსოფლიო საფინანსო სისტემაში ყველაზე რეპუტაციული ბანკის გამოყენებით, Credit Suisse-ის გამოყენებით როგორი ავაზაკური რეკეტი განხორციელდა. ამას ასე თავხედურად, ღიად, შუაგულ შვეიცარიაში აკეთებს ბანკი დაუსჯელად. ამას დღისით, მზისით ავაზაკურად უყურებდა მთელი ევროპა, უყურებდა მთელი საბანკო სისტემა, ევროპის მათ შორის და ნული რეაქცია ჰქონდათ ამაზე.
თქვენ გახსოვთ, მათ შორის ამ დავის მიმდინარეობის პერიოდში სტატიებს უბლოკავდნენ ბიძინა ივანიშვილს. განცხადებებს არ აქვეყნებდნენ მედიაში და რაც აჩვენებდა, რომ არაფორმალური მმართველობა ევროპის კონტინენტზე არა მხოლოდ საბანკო სისტემას მართავს ჩვეულებრივად ხელით, არამედ მედიასაც მართავს პირდაპირ ხელით და ბლოკავდნენ განცხადებებს თუ სხვა სახის მასალას მედიაში ამ დავასთან დაკავშირებით“, – აღნიშნა შალვა პაპუაშვილმა.
მისივე თქმით, ის შეზღუდვები და სანქციები, რომლებიც თავის დროზე ბაიდენის ადმინისტრაციის მიერ აბსოლუტურად სასაცილო საბაბით იყო გამოგონილი, როგორც ჩანს შესაძლოა ახლა ეს გამოიყენონ საბაბად იმისთვის, რომ არ მისცენ მას წვდომა ანგარიშებზე.
„მესამე, ამ დავის ნაწილიც იყო ზუსტად ის, რომ სხვა შეზღუდვებიც მოეფიქრებინათ ბიძინა ივანიშვილთან დაკავშირებით იმისთვის, რომ იცოდნენ რა, ეს იყო აბსოლუტური თავხედური ქცევა ბანკისა, რომელიც ადრე თუ გვიან სასამართლო გადაწყვეტილებით დასრულდებოდა, ამ მომენტისთვის თავი დაეზღვიათ და სხვა მექანიზმები აემუშავებინათ. ამ მხრივ იყო კიდევაც ბიძინა ივანიშვილის განცხადება, რომ მას იმედი არ აქვს ვინმე კანონის უზენაესობას იმ დონეზე აღიარებს, რომ აი ამ მარცხის შემდეგ მაინც მისცენ შესაძლებლობა, რომ მას ჰქონდეს წვდომა საკუთარ ანგარიშებზე. ასე, რომ ის შეზღუდვები და სანქციები, რომლებიც თავის დროზე ბაიდენის ადმინისტრაციის მიერ აბსოლუტურად სასაცილო საბაბით იყო გამოგონილი, როგორც ჩანს შესაძლოა ახლა ეს გამოიყენონ საბაბად იმისთვის, რომ არ მისცენ მას წვდომა ანგარიშებზე.
მე ერთ რამესაც გავუსვამ ხაზს, ჩვენ ვსაუბრობთ შეზღუდვაზე, რომელიც დააწესა ბაიდენის ადმინისტრაციამ, რომელსაც დღევანდელი ადმინისტრაცია მოიხსენებს როგორც „ავტოკალმის“ პრეზიდენტს, რომელმაც თვითონაც არ იცოდა რას აწერდა ხელს.
ასე, რომ ზუსტად ახლა არის ის მომენტი, როდესაც ყველამ უნდა გაიაზროს კიდევ ერთხელ, რა დამოკიდებულება უნდა ჰქონდეთ იმ გადაწყვეტილებების მიმართ, რომლებსაც ბაიდენის ადმინისტრაცია იღებდა სხვა ქვეყნების და ერების დასაზიანებლად“, – განაცხადა პაპუაშვილმა.