უნგრეთის საგარეო საქმეთა მინისტრს, პიტერ სიიარტოს ბოსნია-ჰერცეგოვინაში სამხედრო თვითმფრინავით დაშვების უფლება არ მისცეს, რის გამოც იძულებული გახდა, ბანია-ლუკაში კერძო თვითმფრინავით გაფრენილიყო. ამის შესახებ ინფორმაციას უნგრული მედია ავრცელებს. საბოლოოდ, სიიარტო ბოსნია-ჰერცეგოვინაში Cessna C-650 Citation VI-ით ჩაფრინდა, მის გარდა ბორტზე კიდევ რამდენიმე ადამიანი იმყოფებოდა.
ბოსნია-ჰერცეგოვინის თავდაცვის მინისტრმა, ზუკან ჰელეზმა ეს გადაწყვეტილება იმით ახსნა, რომ უნგრულ მხარეს არ წარმოუდგენია რაიმე მკაფიო განმარტება, რატომ მიფრინავდა სიიარტო ქვეყანაში სამხედრო თვითმფრინავით.
„ვიქტორ ორბანი და პიტერ სიიარტო წლების განმავლობაში უჭერდნენ მხარს ბოსნია-ჰერცოგოვინის შემადგენლობაში მყოფი სერბთა რესპუბლიკის ყოფილი პრეზიდენტის, მილორად დოდიკის საქმიანობას, რომელიც ძირს უთხრის ბოსნია-ჰერცეგოვინის სუვერენიტეტსა და ტერიტორიულ მთლიანობას“, – აღნიშნა ზუკან ჰელეზმა.
მედიის ინფორმაციით, უნგრეთის საგარეო საქმეთა მინისტრი პიტერ სიიარტო ბანია-ლუკაში უნივერსიტეტის საპატიო პროფესორის წოდების მისაღებად გაფრინდა. გავრცელებული ცნობით, წოდება მას სწორედ მილორად დოდიკმა უნდა გადასცეს.