ჰონგ-კონგში რამდენიმე მაღალსართულიანი შენობის დამანგრეველი ხანძრის შედეგად, ამ დროის მონაცემებით, სულ მცირე 128 ადამიანია დაღუპული. ხანძრამდე კორპუსებში მიმდინარე სარემონტო სამუშაოებთან დაკავშირებით, კიდევ რვა ადამიანი დააკავეს, მანამდე დაკავებული უკვე იყო სამი პირი.
ხანძრის გამომწვევი მიზეზი ამ დრომდე გაურკვეველია, თუმცა ოფიციალური პირების თქმით, პოლისტიროლმა და ფანჯრების გარედან დამონტაჟებულმა დამცავმაბადეებმა ხელი შეუწყო მის გავრცელებას. ეს ქალაქში ბოლო 70 წელზე მეტი ხნის განმავლობაში ყველაზე დამანგრეველი ხანძარია. ათობით ადამიანი ჯერ ისევ დაკარგულად ითვლება.
პოლიცია მტკიცებულებების შესაგროვებლად შენობებში უკვე შევიდა. ხელისუფლების განცხადებით, გამოძიება მომდევნო სამ-ოთხ კვირაში ჩატარდება.
კორუფციის წინააღმდეგ ბრძოლის დამოუკიდებელმა კომისიამ (ICAC) განაცხადა, რომ დაკავებულებს შორის იყვნენ საინჟინრო კომპანიის დირექტორები და ხარაჩოების სუბკონტრაქტორები.
რვა საცხოვრებელი კორპუსიდან შვიდზე გავრცელებული ხანძრის ჩასაქრობად დაახლოებით 2 311 მეხანძრე მუშაობდა. ხანძრის ჩაქრობის სამუშაოები ამჟამად შეჩერებულია.
სახანძრო სამსახურის ინფორმაციით, 89 ცხედარი ჯერ კიდევ არ არის იდენტიფიცირებული და შენობებში კიდევ რამდენიმე ცხედარი რჩება.
ამასობაში, ახლომდებარე საზოგადოებრივ დარბაზში, რომელიც დაკარგული ახლობლების მაძიებელი ოჯახებისთვისაა გახსნილი, ხალხი იკრიბება. ნათესავებს სთხოვენ, დაეხმარონ იდენტიფიკაციის პროცესში ოჯახური ფოტოების მიტანით. ჰონგ-კონგის მთავრობამ ასევე შექმნა თავშესაფრები და დახმარების ცენტრები.
ხანძარი ოთხშაბათს, ადგილობრივი დროით 14:51 საათზე გაჩნდა და ადგილობრივი დროით 18:22 საათისთვის სახანძრო სამსახურის წარმომადგენლებმა ის ყველაზე სერიოზულ კატეგორიად შეაფასეს.
ხანძარი სწრაფად გავრცელდა ცალკეულ ბლოკებში შენობების გარედან აალებადი ბადეების და სხვა მასალების არსებობის გამო. დაღუპულთა შორის იდენტიფიცირებულია 37 წლის მეხანძრე ჰო ვაი-ჰო. ის ოთხშაბათს, მასთან კონტაქტის დაკარგვიდან დაახლოებით 30 წუთის შემდეგ ადგილზე უგონოდ იპოვეს. ხელისუფლების ცნობით, კიდევ თორმეტი მეხანძრე დაშავდა.