ავღანელ მამაკაცს, რომელიც აშშ-ის ეროვნული გვარდიის წევრის მკვლელობაშია ბრალდებული, ბრალი წაუყენეს. ინფორმაციას ამის შესახებ „როიტერი“ ავრცელებს.
კოლუმბიის ოლქის პროკურორმა, ჯანინ პირომ განაცხადა, რომ 29 წლის რაჰმანულა ლაკანვალის განზრახ მკვლელობაში ედება ბრალი.
მედიის ინფორმაციით, ეროვნული გვარდიის წევრი, 20 წლის სარა ბეკსტრომი მიყენებული ჭრილობებისგან გარდაიცვალა, მისი კოლეგა, 24 წლის ენდრიუ ვულფი კი კრიტიკულ მდგომარეობაში იმყოფება.
მომხდარს გამოეხმაურა აშშ-ის პრეზიდენტიც. დონალდ ტრამპმა მადლიერების დღეს აშშ-ის სამხედრო მოსამსახურეებთან სატელეფონო საუბრისას განაცხადა, რომ სროლა „ტერორისტული თავდასხმა“ იყო.
ამასთან, ტრამპმა სოციალურ ქსელში დაწერა, რომ შეერთებული შტატები სამუდამოდ შეაჩერებს მიგრაციას მესამე ქვეყნებიდან.
როგორც ტრამპმა აღნიშნა, შეაჩერებს ყველა ფედერალურ შეღავათსა და სუბსიდიას არამოქალაქეებისთვის, ჩამოართმევს მოქალაქეობას მიგრანტებს, რომლებიც ძირს უთხრიან ქვეყნის შიდა სიმშვიდეს და გააძევებს ნებისმიერ უცხო ქვეყნის მოქალაქეს, რომელიც უსაფრთხოებისთვის რისკს წარმოადგენს ან შეუთავსებელია დასავლურ ცივილიზაციასთან.