„უკრაინის ომის მოლაპარაკების გზით დასრულება ჯერ ვერ ხერხდება, რადგან ამის უფლებას ევროპა არ აძლევს ზელენსკის. ამერიკას კი ომის დასრულება ჰაერივით სჭირდება, რადგან ყოველი ახალი დღე აძლიერებს აღმოსავლეთს და ასუსტებს მის გავლენებს,” – ამის შესახებ სოციალურ ქსელში პარტია „ხალხის ძალის” წევრი თამარ ჩიბურდანიძე წერს.
მისი თქმით, ტრამპის გუნდი აუცილებლად დაიწყებს დიდი ფულით ახალი ევროპული პოლიტიკის ჩამოყალიბებას.
„ევროკავშირი გამჭვირვალობის კანონს უფრო ამერიკის წინააღმდეგ იღებს, ვიდრე თუნდაც რუსეთის. ევრობიუროკრატების ანტიამერიკული კამპანია დღითიდღე მძაფრდება. გამჭვირვალობის კანონი არის ქვეყნის უსაფრთხოების დამცავი, სწორედ ამ მიზნით მივიღეთ ის საქართველოში. ევროკავშირის დღის წესრიგში ამ კანონის მიღება დონალდ ტრამპის გაპრეზიდენტების შემდეგ დადგა, როდესაც დასაცავი გახდა ჩრდილოვანი მმართველების პოლიტიკა მათი ოპონენტებისგან. პოლიტიკა ყოველთვის ფულით და იდეოლოგიით ხორციელდება. სწორედ ამ ფულით გატარებულ იდეოლოგიას აღუდგა წინ ევროკავშირი გამჭვირვალობის კანონის მიღებით. მათ ძალიან ეშინიათ იმ ეროვნული ძალების, რომლებიც დღითიდღე ძლიერდებიან ევროპაში და რომლებიც მხარდაჭერას იღებენ ტრამპის ადმინისტრაციისგან.
უკრაინის ომის მოლაპარაკების გზით დასრულება ჯერ ვერ ხერხდება, რადგან ამის უფლებას ევროპა არ აძლევს ზელენსკის. ამერიკას კი ომის დასრულება ჰაერივით სჭირდება, რადგან ყოველი ახალი დღე აძლიერებს აღმოსავლეთს და ასუსტებს მის გავლენებს. დრო არ იცდის, ამიტომ ტრამპის გუნდი აუცილებლად დაიწყებს დიდი ფულით ახალი ევროპული პოლიტიკის ჩამოყალიბებას (სავარაუდოდ დაწყებულიც აქვს), რომელიც გაჰყვება ახალი პოლიტიკის გზას.
სწორედ ამიტომ, ევროკავშირის დღის წესრიგში დადგა გამჭვირვალობის კანონის მიღება, რომელიც გააკონტროლებს ამერიკის ფულს მათ ტერიტორიაზე და უმეტეს შემთხვევაში, აღკვეთავს. დღეს ევროპას იმდენად არ ეშინია რუსეთის, რამდენადაც ამერიკის. ის, რომ ტრამპის 28-პუნქტიანი შეთანხმება არღვევს ევროპის უსაფრთხოებას, მხოლოდ ლიტონი სიტყვებია. მათ სურთ საკუთარი ძალის დემონსტრირება ტრამპისთვის. დიფ-სთეითის ტყვეობაში არსებული ევროპა კი ამით იზოლაციაში აღმოჩნდება და მხოლოდ საკუთარ თავს ავნებს.
გამჭვირვალობის კანონის მიღების შემდეგ, იმედი გვაქვს ევროკავშირის მოთხოვნებიდან საქართველოს მიმართ, დღის წესრიგიდან ამოვარდება ჩვენი გამჭვირვალობის კანონის გაუქმება. რაც შეეხება მეორე მოთხოვნას, “ოჯახური ღირებულებების დაცვის შესახებ” კანონის გაუქმებას, ეს მოთხოვნაც მათ ქვეყნებში სულ მალე ისე მძაფრად დადგება, რომ წინააღმდეგობას ვეღარ გაუწევენ. დღეს ევროპული სახელმწიფოები დემოგრაფიულად “მომაკვდავი ერების” სიაში არიან და ამის მთავარი გამომწვევი მიზეზი სწორედ ოჯახური ღირებულებების და რწმენის განადგურებაა მათში.
დიდი ქაოსი დიდი წესრიგის ნაცვლად – ეს არის რუსეთ-უკრაინის ომის ავტორების მიერ შემუშავებული პოლიტიკური დღის წესრიგის შედეგი. ახალი მსოფლიო წესრიგი, სადაც მათ სურდათ ლიდერობა, სხვის სასარგებლოდ ლაგდება. ამას ხვდება ყველა და სწორედ ამიტომ, მთელი დასავლეთი ქაოსმა მოიცვა. ვნახოთ, ვინ შეძლებს ამ ქაოსიდან მშვიდობიანად გამოსვლას?
რაც შეეხება გამჭვირვალობის კანონს, საქართველოში უკვე ბავშვებიც კი დარწმუნდნენ იმ დიდ პოლიტიკურ აფიორაში, რაც სამი წლის წინ ევრობიუროკრატებმა და ჩრდილოვანმა მმართველებმა საქართველოში დაატრიალეს. ჩვენ ამას გავუძელით მორწმუნე ქართველი ერის მხარდაჭერით, მაგრამ ამას ვერ გაუძლებს თანამედროვე ევროპა, რადგან მათში რწმენაც და ღირებულებებიც კვდომას განიცდის. თუმცა, აქვთ შანსი გადარჩენის და ეს დამოკიდებულია არა დროებით მმართველ ევრობიუროკრატებზე, არამედ, გონიერ ევროპელ ხალხზე,” – წერს თამარ ჩიბურდანიძე.