უკრაინის საგარეო საქმეთა მინისტრი ანდრეი სიბიგა აცხადებს, რომ ვლადიმერ პუტინი ვიქტორ ორბანს თავის სისხლიან სპექტაკლში მონაწილეობის მისაღებად იყენებს.
როგორც სიბიგა სოციალურ ქსელში წერს, მოსკოვში უნგრეთის პრემიერის ვიზიტის შემდეგ, ისევე როგორც 2024 წელს, რუსეთმა უკრაინაზე მასშტაბური თავდასხმა განახორციელა.
„რთული ღამე იყო უკრაინაში, განსაკუთრებით კიევში. რუსეთმა ათობით ფრთოსანი და ბალისტიკური რაკეტა და 500-ზე მეტი დრონი ესროლა ჩვეულებრივ სახლებს, ენერგოსისტემას და კრიტიკულ ინფრასტრუქტურას. სულ მცირე, ორი ადამიანი დაიღუპა და 24 დაშავდა, მათ შორის ერთი ბავშვი.
მიუხედავად იმისა, რომ ყველა სამშვიდობო გეგმების პუნქტებს განიხილავს, რუსეთი აგრძელებს თავისი „საომარი გეგმის“ ორპუნქტიან განხორციელებას – მოკვლა და განადგურება. ასევე აღსანიშნავია, თუ როგორ გამოიყენა პუტინმა ვიქტორ ორბანი თავისი ტერორის თანამონაწილედ. 2024 წელს ორბანის მოსკოვში ვიზიტს მოჰყვა რუსეთის საშინელი დარტყმა უკრაინის ოხმადდიტის ბავშვთა საავადმყოფოზე.
ამჯერად, ორბანის ვიზიტისთანავე, რუსეთის მასშტაბური თავდასხმა უკრაინის დედაქალაქზე და ცარიელი სიტყვები „მშვიდობის“ შესახებ.
პუტინი უბრალოდ იყენებს ასეთ პოლიტიკოსებს მსახიობებად თავის სისხლიან სპექტაკლში. პუტინს სურს ომის გახანგრძლივება ნებისმიერ ფასად. ომს ის ვერ მოიგებს და უარს ამბობს მის დასრულებაზე. თუმცა საერთაშორისო საზოგადოებას აქვს საშუალება უზრუნველყოს, რომ ეს ფასი რუსეთისთვის აუტანელი გახდეს.
ჩვენ მოვუწოდებთ მოკავშირეებს უკრაინის თავდაცვისა და მდგრადობის დამატებით მხარდაჭერისთვის, რუსეთის წინააღმდეგ დამატებით მკაცრი სანქციებისა და სწრაფი გადაწყვეტილების მიღებისაკენ, რათა შესაძლებელი გახდეს რუსული გაყინული აქტივების სრულად გამოყენება. ძალა, ერთიანობა და მოსკოვზე ზეწოლა კვლავ აუცილებელია სამშვიდობო ძალისხმევის წინსვლისთვის“, – წერს სიბიგა.