ფლორიდაში უკრაინისა და აშშ-ის დელეგაციების მოლაპარაკებები დაიწყო. აღნიშნულის შესახებ უკრაინის ეროვნული უსაფრთხოებისა და თავდაცვის საბჭოს თავმჯდომარე რუსტემ უმეროვი სოციალურ ქსელში წერს.
უკრაინის დელეგაციის ხელმძღვანელმა, რუსტემ უმეროვმა მადლობა გადაუხადა აშშ-ის პრეზიდენტს, დონალდ ტრამპს მისი სამშვიდობო ინიციატივებისთვის.
„სამართლიანი მშვიდობის მიღწევისკენ გადადგმული ნაბიჯების შესახებ უკრაინის დელეგაციასა და ამერიკულ მხარეს შორის შეხვედრა შეერთებულ შტატებში უკვე დაიწყო. მე მუდმივ კონტაქტზე ვარ უკრაინის პრეზიდენტთან. ჩვენ გვაქვს მკაფიო მითითებები და პრიორიტეტები: უკრაინის ინტერესების დაცვა, არსებითი დიალოგის უზრუნველყოფა და ჟენევაში მიღწეული პროგრესის საფუძველზე წინსვლა. ჩვენ ვმუშაობთ უკრაინისთვის რეალური მშვიდობისა და საიმედო, გრძელვადიანი უსაფრთხოების გარანტიების უზრუნველსაყოფად. დელეგაცია დღევანდელი შეხვედრების დასრულების შემდეგ უკრაინის პრეზიდენტს ანგარიშს წარუდგენს“, – წერსუმეროვი.
ამასთან, შეხვედრის დაწყებამდე აშშ-ის სახელმწიფო მდივანმა, მარკო რუბიომ განაცხადა, რომ ის უკრაინელ ოფიციალურ პირებთან მოლაპარაკებების შედეგად უკრაინაში ომის დასრულების შეთანხმების მიღწევისკენ „მეტ პროგრესს“ ელოდება.
„საქმე მხოლოდ სამშვიდობო შეთანხმებებს არ ეხება. საქმე ეხება წინსვლის გზის შექმნას, რომელიც უკრაინას სუვერენულ, დამოუკიდებელ და აყვავებულ ქვეყნად აქცევს და ამიტომ ჩვენ დღეს კიდევ უფრო მეტ პროგრესს ველოდებით“, – განაცხადა რუბიომ.