ალექსანდრ ლუკაშენკოს მიერ შეწყალებული პატიმრების ნაწილი უკრაინაში ჩავიდა, აწილი ლიეტუვაში.
საერთო ჯამში, ბელარუსმა უკრაინას 114 პატიმარი გადასცა, მათ შორის ხუთი უკრაინის მოქალაქეა, ასევე ბელარუსის ოპოზიციის ლიდერები, ყოფილი პრეზიდენტობის კანდიდატი ვიქტორ ბაბარიკო და მარია კოლესნიკოვა.
ბელარუსის მიერ გათავისუფლებულ პატიმრებს საზღვარზე უკრაინის თავდაცვის სამინისტროს მთავარი სადაზვერვო სამმართველოს ხელმძღვანელი კირილ ბუდანოვი დახვდა.
როგორც უკრაინული მედია წერს, გათავისუფლებული პატიმრებს, საჭირო სამედიცინო დახმარების მიღების შემდეგ და მათი მოთხოვნით, პოლონეთსა და ლიეტუვაში გადაიყვანენ.
აღნიშნულ საკითხს უკრაინის პრეზიდენტი ვოლოდიმირ ზელენსკი გამოეხმაურა და აღნიშნა, რომ პატიმრების გათავისუფლება აშშ-ის აქტიური როლისა და უკრაინის სადაზვერვო სამსახურების თანამშრომლობის წყალობით მოხდა.
ამასთან, ლიეტუვაში იმყოფება ნობელის პრემიის ლაურეატი, პატიმრობიდან გათავისუფლებული ალეს ბიალაცკი.
ლუკაშენკოს მიერ პატიმრების შეწყალებას ევროპარლამენტის პრეზიდენტი რობერტა მეცოლა გამოეხმაურა.
„მივესალმები ბელარუსში არაერთი პოლიტიკური პატიმრის გათავისუფლებას, მათ შორის სახაროვის პრემიის ლაურეატების, მარია კოლესნიკოვას და ალეს ბიალაცკის, ასევე მშვიდობის დარგში ნობელის პრემიის ლაურეატის. მათ იმდენი გადაიტანეს. ვუსურვებ ძალას, რათა შეხვდნენ თავიანთ ოჯახებსა და საყვარელ ადამიანებს. ევროპარლამენტი გააგრძელებს ბრძოლას ბელარუსში ყველა პოლიტიკური პატიმრის გათავისუფლებისთვის, მათ შორის ჟურნალისტ ანდჟეი პოჩობუტის, რომელსაც სამშაბათს, სტრასბურგში, სახაროვის პრემიით დავაჯილდოვებთ. მათთვის, ვინც ჯერ კიდევ ციხეში იმყოფება – ჩვენ არ დაგივიწყებთ. ბელარუსი თავისუფალი იქნება“, – წერს რობერტა მეცოლა.