უნგრეთში ბავშვებზე ძალადობის სკანდალის გამო მთავრობის გადადგომის მოთხოვნით მასშტაბური საპროტესტო აქცია გაიმართა.
უნგრეთის ათასობით მოქალაქემ, ოპოზიციის ლიდერის, პიტერ მაგიარის ხელმძღვანელობით, უნგრეთის პრემიერ-მინისტრის, ვიქტორ ორბანის ადმინისტრაციისკენ მსვლელობა გამართა.
დემონსტრანტებს ხელში ეკავათ ბანერი წარწერით: „დაიცავით ბავშვები“. აქციის მონაწილეები სკანდირებდნენ, რომ ქვეყანაში ყოველდღე სულ უფრო უარესი ამბები ხდება და მთავრობა უნდა გადადგეს. მოქალაქეები აპროტესტებდნენ არასრულწლოვანთა დაწესებულებაში რამდენიმე წლის წინ მომხდარ ძალადობას, რომლის ამსახველი კადრებიც ახლა გასაჯაროვდა.
კერძოდ, არასრულწლოვანთა ცენტრში მომხდარი ძალადობის ამსახველი ვიდეოს გავრცელების შემდეგ დაწესებულების დირექტორი თანამდებობიდან გადადგა. მას პროსტიტუციაში, ფულის გათეთრებასა და ადამიანებით ვაჭრობაში ედება ბრალი. პროკურატურის ცნობით, აღნიშნულ საქმესთან დაკავშირებით შვიდი ადამიანია დაკავებული. საქმეზე გამოძიება გრძელდება.