სიდნეიში ებრაული თემის წევრებზე განხორციელებული თავდასხმის შემდეგ, ისრაელის პრემიერ-მინისტრმა, ბენიამინ ნეთანიაჰუმ ავსტრალიის ხელისუფლება ანტისემიტიზმთან არასაკმარის ბრძოლაში დაადანაშაულა.
„ავსტრალიის მთავრობის პოლიტიკა ხელს უწყობს და ახალისებს ანტისემიტიზმს ავსტრალიაში“, – განაცხადა ნეთანიაჰუმ.
მისივე მტკიცებით, ამის შესახებ ოთხი თვის წინ წერილში გააფრთხილა ავსტრალიის პრემიერ-მინისტრი ენტონი ალბანეზე.
ისრაელის პრემიერ-მინისტრმა განაცხადა, რომ ავსტრალიის მიერ, სხვა ქვეყნებთან ერთად, პალესტინის სახელმწიფოს აღიარება „ანტისემიტურ ცეცხლს ნავთს ასხამს“. მისივე თქმით, ამგვარი ნაბიჯი წაახალისებს პალესტინური რადიკალური დაჯგუფება „ჰამასის“ მებრძოლებს, რომელიც მსოფლიოს მრავალ ქვეყანაში, მათ შორის აშშ-სა და ევროკავშირში ტერორისტულ ორგანიზაციად არის აღიარებული.
„ეს ნაბიჯი აძლიერებს იმ ადამიანების პოზიციებს, რომლებიც ავსტრალიელ ებრაელებს ემუქრებიან და ხელს უწყობენ ებრაელების მიმართ სიძულვილს, რომელიც ახლა თქვენს ქუჩებზე ვრცელდება“, – განაცხადა ნეთანიაჰუმ.
ისრაელის ლიდერმა ანტისემიტიზმი სიმსივნეს შეადარა.
„თქვენ არაფერი გააკეთეთ, რათა შეგეკავებინათ კიბოს უჯრედები, რომლებიც თქვენს ქვეყანაში იზრდებოდა. არ გადაგიდგამთ არცერთი ნაბიჯი. თქვენ მიეცით ამ დაავადებას გავრცელების საშუალება და შედეგად მივიღეთ ის საშინელი თავდასხმები ებრაელებზე, რომლებიც დღეს ვიხილეთ“, – განაცხადა ისრაელის მთავრობის მეთაურმა.
ამავე დროს, ნეთანიაჰუმ შეაქო გამვლელი, რომელმაც ერთ-ერთი თავდამსხმელი განაიარაღა. „როგორც გაირკვა, ეს იყო მამაცი მუსლიმი“, – თქვა ისრაელის პრემიერ-მინისტრმა.
ნეთანიაჰუმ ავსტრალიას მოუწოდა, გადამწყვეტი ზომები მიიღოს ანტისემიტიზმის წინააღმდეგ.
„ისრაელი ამას ელოდება დასავლეთის თითოეული მთავრობისგან, რადგანაც ეს დაავადება ვრცელდება და საბოლოოდ თქვენც დაგაინფიცირებთ“, – თქვა ისრაელის მთავრობის მეთაურმა.
ცნობისთვის, 14 დეკემბერს სიდნეის პოპულარულ ბონდი ბიჩის პლაჟზე ხანუქას დღესასწაულის აღსანიშნად შეკრებილ ებრაული თემის წევრებზე ორი შეიარაღებული პირის თავდასხმის შედეგად, 16 ადამიანი დაიღუპა, მათ შორის, ერთ-ერთი სავარაუდო თავდამსხმელი. მეორე თავდამსხმელი დაჭრილია, კრიტიკულ მდგომარეობაში იმყოფება და დაკავებულია. კიდევ 40 ადამიანი, მათ შორის, ორი პოლიციელი დაშავდა.
სოციალურ ქსელებში გავრცელდა ვიდეოჩანაწერი, რომელიც სავარაუდოდ შემთხვევითმა გამვლელმა გადაიღო. კადრებში ჩანს, როგორ ართმევს მამაკაცი თავდამსხმელს იარაღს.
თავდასხმა მოხდა ებრაული დღესასწაულის აღნიშვნისას, როდესაც პლაჟზე ასობით ადამიანი იყო შეკრებილი, მათ შორის ბევრი ოჯახი ბავშვებთან ერთად.
„სროლა მიზანმიმართული იყო ებრაული თემის წინააღმდეგ ხანუქას პირველ დღეს“, – განაცხადა ახალი სამხრეთ უელსის შტატის პრემიერ-მინისტრმა, კრის მინსმა.
შეგახსენებთ, რომ ავსტრალიამ, დიდ ბრიტანეთთან და კანადასთან ერთად, პალესტინის სახელმწიფო სექტემბრის ბოლოს აღიარა. ავსტრალიის მთავრობის მეთაურმა ამ ნაბიჯს უწოდა „კოორდინირებული საერთაშორისო ძალისხმევის ნაწილი, რომელიც მიზნად ისახავს ორ სახელმწიფოზე დაფუძნებული მშვიდობის პროცესის ახალი იმპულსის მინიჭებას“. „ტერორისტულ ორგანიზაცია „ჰამასს“ არ უნდა ჰქონდეს როლი პალესტინაში“, – განაცხადა ავსტრალიის პრემიერ-მინისტრმა, ენტონი ალბანეზემ.