უნგრეთმა, რომელიც უკრაინის ევროკავშირში გაწევრიანების წინააღმდეგ გამოდის, დაბლოკა ევროკავშირის ყოველწლიური განცხადება გაფართოების პროცესის შესახებ. ინფორმაციას ამის შესახებ გერმანული გამოცემა Deutsche Welle ავრცელებს.
დანიამ, რომელიც ამჟამად ევროკავშირის თავმჯდომარეა, ბრიუსელში გამართულ კონსულტაციებზე განაცხადა, რომ პრემიერ-მინისტრ ვიქტორ ორბანის მთავრობამ არ დაუჭირა მხარი უკრაინის ევროინტეგრაციისკენ მიმართული ძალისხმევის დადებით შეფასებას.
ევროკავშირის სხვა სახელმწიფოებმა დაადასტურეს, რომ უკრაინამ პროგრესს მიაღწია ბრიუსელის მოთხოვნების შესრულებაში, განაცხადა დანიის ევროპის საქმეთა მინისტრმა, მარი ბიერემ.
„26 წევრი ქვეყანა უკრაინის მიმართ ძლიერ მხარდაჭერას ავლენს, უკრაინა კი დაპირებებს ასრულებს“, – ციტირებს ბიერეს სიტყვებს სააგენტო dpa.
მისი თქმით, განცხადების პროექტში უკრაინასთან დაკავშირებული ფორმულირებები სამართლიანი და თანაზომიერი იყო.
გერმანიის ევროპის საქმეთა მინისტრმა, გუნტერ კრიხბაუმმა უნგრეთის ქმედებებს „სულ უფრო დესტრუქციული“ უწოდა და ბუდაპეშტის მთავრობა ევროკავშირის გადაწყვეტილებების ხელის შეშლაში დაადანაშაულა.