გამოცემა Huffington Post-ის ინფორმაციით, დონალდ ტრამპის ადვოკატებმა, დიდი ბრიტანეთის ყოფილი პრემიერ-მინისტრის, ლიზ ტრასის კომენტარები გამოიყენეს, რათა გაემყარებინათ აშშ-ის პრეზიდენტის სამართლებრივი საქმე BBC-ის წინააღმდეგ, გადაცემა “Panorama”-ში მისი სიტყვების რედაქტირების გამო.
ტრამპმა სამშაბათს განაცხადა, რომ მან ოფიციალურად შეიტანა 10 მილიარდი დოლარის (7.4 მილიარდი ფუნტი სტერლინგი) ოდენობის სარჩელი ცილისწამების შესახებ მაუწყებლის წინააღმდეგ.
სარჩელში BBC-ს ბრალი ედება პრეზიდენტ ტრამპის შესახებ „ცრუ, რეპუტაციის შემლახველი, შეცდომაში შემყვანი, დამამცირებელი, პროვოკაციული და მავნებლური“ ინფორმაციის გავრცელებაში და მაუწყებლის ეს ქმედება მოხსენიებულია „უნამუსო მცდელობად, ჩარეულიყო და გავლენა მოეხდინა“ 2024 წლის აშშ-ის საპრეზიდენტო არჩევნებზე.
“ტრასი, რომელიც ცნობილია დაუნინგ სტრიტზე თავისი ისტორიულად მოკლე პერიოდით, 2022 წელს თანამდებობიდან გადადგომის და მოგვიანებით, 2024 წელს მანდატის დაკარგვის შემდეგ, კიდევ უფრო მეტად გადაიხარა MAGA-სკენ.
მან მოუწოდა ტრამპის სტილის „რევოლუციისკენ” დიდ ბრიტანეთში და გამოვიდა შტატებში მემარჯვენეების მრავალ ღონისძიებაზე, რომლებიც თავს ესხმოდნენ ბრიტანეთის სახელმწიფოს. ამიტომ, ალბათ გასაკვირი არც არის, რომ მისი სიტყვები ტრამპის საქმის გამყარებისთვის გამოიყენეს.” – წერს გამოცემა.
სტატიის თანახმად, სარჩელში მოყვანილია ყოფილი პრემიერ-მინისტრის კრიტიკა მაუწყებლის მიმართ, რომელიც “პანორამას” სკანდალის შემდეგ გამოთქვა და განაცხადა, რომ BBC ჟურნალისტიკის დაკარგული „მაგალითი“ იყო და მაუწყებელი დიდი ხანია „ყალბ ამბებს“ ავრცელებდა.
დოკუმენტში ასევე ნახსენებია კონსერვატიული პარტიის ლიდერი, კემი ბეიდინოკი, რომელიც რეგულარულად ადანაშაულებდა მაუწყებელს მემარცხენეების სასარგებლოდ მიკერძოებაში.