მძინარე დათვის გვერდით თუ ცხოვრობ, ნუ გააღვიძებ მას. იპოვე ნორმალური ურთიერთობები, – ამის შესახებ ბელარუსის პრეზიდენტმა ალექსანდრ ლუკაშენკომ ტელეარხ NewsMax TV-სთან ინტერვიუში რუსეთ-უკრაინის კონფლიქტზე საუბრისას განაცხადა.
მისივე თქმით, 2014 წელს კიევში გადატრიალების შემდეგ, უკრაინის ახალმა ხელისუფლებამ ყველაფერი რუსულის განადგურების კურსი დაისახა.
როგორც ლუკაშენკომ აღნიშნა, საომარი მოქმედებების გაგრძელებამ შესაძლოა, უკრაინის გაქრობა გამოიწვიოს. მისივე თქმით, კონფლიქტი თუ გაგრძელდება, ესკალაცია მხოლოდ გაიზრდება და შესაძლოა, ეს გლობალურ ფორმატში გადავიდეს. ლუკაშენკომ მოუწოდა დასავლეთს, თავი შეიკავოს უკრაინისთვის ახალი იარაღის მიწოდებისგან.
ალექსანდრ ლუკაშენკომ ასევე შეაფასა ბრძოლის ველზე არსებული ვითარება და აღნიშნა, რომ რუსეთი უპირატესობას იძენს.
ბელარუსის პრეზიდენტმა ასევე კომენტარი გააკეთა ყირიმის საკითხზე. ლუკაშენკოს თქმით, უკრაინელებმა თავად გადასცეს ის რუსეთს და მისთვის ბრძოლას არ აპირებდნენ.
როგორც ლუკაშენკომ აღნიშნა, „დღეს უკრაინის ხელისუფლება, მათ შორის ზელენსკი, ამტკიცებს, რომ ყირიმი უკრაინულია, თუმცა 2014 წელს უკრაინას ნახევარკუნძულისთვის არ უბრძოლია“.
„ეს ჩემ თვალწინ მოხდა. უკრაინიდან არც ერთი გასროლა არ განხორციელებულა. თუ თქვენი მიწაა, რატომ არ დაიცავი იგი? უკრაინელებმა ის დათმეს. უბრალოდ, რუსებს გადასცეს. რუსეთი ყირიმს არასდროს დააბრუნებს. ვერ წარმომიდგენია, რა უნდა მოხდეს, რომ რუსებმა დატოვონ იქაურობა, სადაც ახლა არიან. ამიტომ, შესაძლოა, ეს საკითხი უკვე გადაწყვეტილია“, – განაცხადა ლუკაშენკომ.
ალექსანდრ ლუკაშენკომ ასევე განაცხადა, რომ დონალდ ტრამპი მეტ ზეწოლას ახდენს ვოლოდიმირ ზელენსკიზე, რომელსაც არ სურს შეთანხმების დადება.
„რატომ არ სურს მას? რადგან ევროპელები ჩაერთნენ და ყურში უჩურჩულებენ, რომ ზელენსკის ბრძოლაში დაეხმარებიან. ისინი საერთოდ არ დაეხმარებიან. მათ არ აქვთ ის რესურსები, რაც შეერთებულ შტატებს. ამერიკელები თუ უკან დაიხევენ, ესკალაცია გარდაუვალია. მაშინ მაკრონი, მერცი და სტარმერი თავიანთ შეცდომას მიხვდებიან“, – განაცხადა ბელარუსის პრეზიდენტმა.