უკრაინის უმაღლესი რადის მმართველი ფრაქცია „ხალხის მსახურის“ თავმჯდომარის დავით არახამიას განცხადებით, რუსეთთან ცეცხლის შეწყვეტის შეთანხმების პირობები ცუდი ან ძალიან ცუდი იქნება.
მისი თქმით, ცეცხლის შეწყვეტის შესახებ შეთანხმების რეალიზება აშშ-ის მონაწილეობაზეა დამოკიდებული.
„კარგი შეთანხმება ვერ იქნება, და ჩვენ ყველას, ყველა ადამიანს, ვისაც მსჯელობის უნარი აქვს, ეს გვესმის. თუმცა, არსებობენ ადამიანები, რომლებიც დღემდე ფიქრობენ, რომ ჩვენ შეთანხმების რაღაც ფანტასტიკურ პირობებს უნდა ვითხოვდეთ. ანუ, ის ან ცუდი, ან ძალიან ცუდი, ანდა საერთოდ არ იქნება“, – განაცხადა არახამიამ.
მმართველი ფრაქციის თავმჯდომარის თქმით, კიევმა და ვაშინგტონმა რამდენიმე პუნქტთან დაკავშირებით შეთანხმებას ჯერ კიდევ ვერ მიაღწიეს. შეუთანხმებელ საკითხებს შორისაა დონბასის ტერიტორიები და უკრაინისთვის უსაფრთხოების გარანტიების მიცემა.