ბელგიის პრემიერ-მინისტრმა ბარტ დე ვევერმა ევროპული საბჭოს სამიტის დასრულების შემდეგ გამართულ პრესკონფერენციაზე ხუმრობით თქვა, რომ ახლა ის საკუთარ აგარაკზე, სანქტ-პეტერბურგთან ახლოს ბრუნდება, სადაც მისი მეზობლები ცნობილი ფრანგი მსახიობი ჟერარ დეპარდიე და სირიის ყოფილი პრეზიდენტი ბაშარ ასადი არიან.
„ახლა უნდა დავბრუნდე ჩემს აგარაკზე სანქტ-პეტერბურგთან ახლოს. ჩემი მეზობელი დეპარდიეა, ხოლო გზის გადაღმა ასადი ცხოვრობს. ვფიქრობ, რომელიმე პატარა სოფლის მერი გავხდებოდი“, – განაცხადა დე ვევერმა და ბოლოს დააყოლა, რომ ეს ხუმრობა იყო.
ცნობისთვის, ევროპელი ლიდერები ბელგიის პრემიერს მკაცრად აკრიტიკებდნენ იმის გამო, რომ ის გაყინული რუსული აქტივების უკრაინისთვის გადაცემას ეწინააღმდეგებოდა. დე ვევერის მთავარი არგუმენტი იყო ის, რომ რუსული აქტივები ბელგიურ ბანკ Euroclear-ში ინახება, ხოლო, თუ რუსეთი ბელგიას უჩივლებდა, ბრიუსელს დიდი რეპუტაციული და ფინანსური ზიანი მიადგებოდა.