ევროკავშირი ვენესუელაში არსებულ ვითარებას ყურადღებით აკვირდება, – ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა განაცხადა.
მისივე თქმით, გაერთიანებამ არაერთხელ აღნიშნა, რომ ვენესუელის პრეზიდენტი ნიკოლას მადურო ლეგიტიმურობას მოკლებულია.
„ვესაუბრე სახელმწიფო მდივანს, მარკო რუბიოს და კარაკასში ჩვენს ელჩს. ევროკავშირი ვენესუელაში არსებულ ვითარებას ყურადღებით აკვირდება. ევროკავშირმა არაერთხელ განაცხადა, რომ ბატონ მადუროს ლეგიტიმურობა აკლია და მშვიდობიანი გარდამავალი პერიოდის მომხრეა. ნებისმიერ ვითარებაში საერთაშორისო სამართლისა და გაერო-ს ქარტიის პრინციპები დაცული უნდა იყოს“, – წერს კაია კალასი სოციალურ ქსელ X-ზე.
კალასის თქმით, გაერთიანებისთვის მთავარ პრიორიტეტს ვენესუელაში ევროკავშირის მოქალაქეების უსაფრთხოება წარმოადგენს.
ცნობისთვის, აშშ-ის სამხედროებმა ვენესუელაში სამხედრო ბაზები, ქვეყნის მთავარი პორტი და პარლამენტის შენობა დაბომბეს. ვენესუელის მთავრობამ განცხადება გაავრცელა, რომლის თანახმად, პრეზიდენტმა ნიკოლას მადურომ ქვეყანაში საგანგებო მდგომარეობა გამოაცხადა. ვენესუელის მთავრობამ აშშ თავდასხმაში დაადანაშაულა და „სამხედრო აგრესია“ დაგმო, ამ აგრესიის მიზნად კი ვაშინგტონის მიერ ქვეყნის ნავთობისა და მინერალების მითვისების სურვილი დაასახელა. ამასთან, აშშ-ის პრეზიდენტის, დონალდ ტრამპის განცხადებით, ამერიკელმა სამხედროებმა ვენესუელის ლიდერი ნიკოლას მადურო მეუღლესთან ერთად შეიპყრეს და ქვეყნიდან გაიყვანეს. აშშ-ის სახელმწიფო მდივნის, მარკო რუბიოს განცხადებით, ნიკოლას მადურო არ არის ვენესუელის პრეზიდენტი, ის ნარკოტერორისტული ორგანიზაციის ხელმძღვანელია, რომელსაც ბრალად ედება აშშ-ში ნარკოტიკების შეტანა.