დიდი ბრიტანეთის პრემიერ-მინისტრის კირ სტარმერის განცხადებით, მისი ქვეყანა ვენესუელაზე თავდასხმაში არ მონაწილეობდა. ინფორმაციას Reuters-ი ავრცელებს.
როგორც სტარმერმა აღნიშნა, მას აშშ-ის პრეზიდენტთან დონალდ ტრამპთან საუბარი სურს, რათა გაიგოს, თუ რა მოხდა ვენესუელაში.
„თავდაპირველად მსურს დავადგინო ფაქტები. მსურს გავესაუბრო პრეზიდენტ ტრამპს და მოკავშირეებს. შემიძლია აბსოლუტური სიცხადით განვაცხადო, რომ ჩვენ ამაში ჩართულები არ ვყოფილვართ… ყოველთვის ვამბობ და მჯერა, რომ ყველამ საერთაშორისო სამართალი უნდა დავიცვათ“, – განაცხადა სტარმერმა.
ცნობისთვის, დღეს დილით კარაკასში რამდენიმე აფეთქების ხმა გაისმა. მოგვიანებით, აშშ-ის პრეზიდენტმა დონალდ ტრამპმა ვენესუელის წინააღმდეგ ჩატარებული მასშტაბური სამხედრო ოპერაციის შესახებ განაცხადა და აღნიშნა, რომ ქვეყნის პრეზიდენტი ნიკოლას მადურო მეუღლესთან ერთად დაკავებული და ქვეყნიდან გაყვანილია.