ჩინეთმა დაგმო აშშ-ის ქმედებები ვენესუელაში საგარეო საქმეთა სამინისტროს მიერ გავრცელებულ განცხადებაში.
„ჩინეთი ღრმად არის შოკირებული და მკაცრად გმობს აშშ-ის მხრიდან სუვერენული სახელმწიფოს წინააღმდეგ ძალის აშკარა გამოყენებას და მის პრეზიდენტზე [ნიკოლას მადუროზე] განხორციელებულ მოქმედებას“, – განაცხადა ჩინეთის საგარეო უწყების წარმომადგენელმა.
„აშშ-ის მსგავსი ჰეგემონური ქმედებები უხეშად არღვევს საერთაშორისო სამართალს, ვენესუელის სუვერენიტეტს და საფრთხეს უქმნის მშვიდობასა და უსაფრთხოებას ლათინურ ამერიკასა და კარიბის ზღვის რეგიონში. ჩინეთი კატეგორიულად ეწინააღმდეგება ამას. ჩვენ მოვუწოდებთ აშშ-ს, დაიცვას საერთაშორისო სამართალი, გაეროს წესდების მიზნები და პრინციპები და შეწყვიტოს სხვა ქვეყნების სუვერენიტეტისა და უსაფრთხოების ხელყოფა“, – აღნიშნეს უწყებაში.
ცნობისთვის, დღეს დილით კარაკასში რამდენიმე აფეთქების ხმა გაისმა. მოგვიანებით, აშშ-ის პრეზიდენტმა დონალდ ტრამპმა ვენესუელის წინააღმდეგ ჩატარებული მასშტაბური სამხედრო ოპერაციის შესახებ განაცხადა და აღნიშნა, რომ ქვეყნის პრეზიდენტი ნიკოლას მადურო მეუღლესთან ერთად დაკავებული და ქვეყნიდან გაყვანილია.