აშშ-ის სახელმწიფო მდივანი მარკო რუბიო აცხადებს, რომ ვენესუელაში ჩატარებულ სამხედრო ოპერაციაზე კონგრესის ნებართვა არ იყო საჭირო.
„ეს საჭირო არ იყო, რადგან ეს არ არის ინვაზია. ჩვენ არ დაგვიკავებია ქვეყანა. ეს იყო დაპატიმრების ოპერაცია. ეს არის სამართალდამცავი ოპერაცია“, – განაცხადა რუბიომ „ეიბისისთან“ ინტერვიუში.
მარკო რუბიოს თქმით, შეერთებული შტატები აკონტროლებს, როგორ განვითარდება ვენესუელაში მოვლენები, რადგან ამერიკას აქვს ზეწოლის საშუალებები.
შეერთებული შტატების სახელმწიფო მდივნის განმარტებით, ზეწოლა გულისხმობს სამხედრო ბლოკადას – აშშ შეზღუდავს იმ გემების გადაადგილებას, რომლებიც სანქცირებულების სიაში არიან და ცდილობენ ვენესუელიდან ნავთობის გატანას ან მის შეტანას.
„ჩვენ შეგვიძლია, თავად გადავწყვიტოთ, რომელ გემებს დავბლოკავთ. ყველა მათგანზე სასამართლოს ბრძანება გვაქვს. ეს ისევ იქნება ძალაში, ვიდრე ადამიანები, რომლებსაც ხელისუფლების ბერკეტებზე კონტროლი აქვთ ამ ქვეყანაში, არ განახორციელებენ ცვლილებებს, რაც არა მხოლოდ ვენესუელის ხალხის ინტერესებშია, არამედ შეერთებული შტატებისაც, და იმ საკითხთა შორისაა, რომლებიც ჩვენ გვაინტერესებს“, – განაცხადა რუბიომ.