საპარლამენტო უმრავლესობის წევრები “TV პირველს” მამუკა მდინარაძის განცხადებების მიზანმიმართულ დამახინჯებაში ადანაშაულებენ. დეპუტატების განცხადებით, საუბარია, 14 თვის წინ გაკეთებულ კომენტარზე, სადაც მამუკა მდინარაძე მადუროს განცხადებას არაღიარების პოლიტიკის წარმატებისთვის იყენებდა.
“თუ მადურომ ის დაინახა, რომ ამ ქვეყანაში არჩევნები ლეგიტიმურად ჩატარდა და პრობლემები არა აქვს ამ ქვეყანასთან, ხვალ დიდი შანსია, რომ აღიარება უკან წაიღოს. ეს არაღიარების პოლიტიკის პირველი წარმატებაა”, – განაცხადა მაშინ მამუკა მდინარაძემ.
ვენესუელაში 2 დღის წინ განვითარებული მოვლენების შემდეგ კი “TV პირველმა” ეს ფრაზა სხვა კონტექსტში წარმოაჩინა. თბილისში ამბობენ, რომ დღესაც, ხელისუფლებას იგივე ინტერესი აქვს, ვენესუელამ უკან წაიღოს ოკუპირებული ტერიტორიების აღიარება.
საკითხს გამოეხმაურა “ხალხის ძალის” თავმჯდომარის მოადგილე. გურამ მაჭარაშვილის განცხადებით, მამუკა მდინარაძეს ჰქონდა პოზიცია, რომელიც ნებისმიერ პატრიოტ ქართველს ექნება.
“მათი მიზანმიმართული ქმედებაა, დაამახინჯოს ყველა ის განცხადება, რომელიც საქართველოს ეროვნული ინტერესის სასარგებლოდაა. ის, რაც თქვა მამუკა მდინარაძემ, იყო პოზიცია, რომელიც ექნება ნებისმიერ პატრიოტ ქართველს – ყველა ის ქვეყანა, რომელმაც უსამართლოდ აღიარა ჩვენი ქვეყნის ტერიტორიების დამოუკიდებლობა, წაიღოს უკან, ანუ აღარ აღიაროს ეს ტერიტორიული დამოუკიდებლობები.
რუსეთმა რომ წაიღოს უკან დამოუკიდებლობის აღიარება, თქვას, აღარ ვაღიარებ აფხაზეთის და სამაჩაბლოს დამოუკიდებლობას – კარგი არ იქნება?! რა თქმა უნდა, კარგი იქნება და პირველი ვიქნები, ვინც იტყვის, რომ ეს არის მისასალმებელი ნაბიჯი. ცუდი იქნება “ნაცმოძრაობისთვის”, “TV პირველისთვის” იმიტომ, რომ საქართველოსთვის ყველაფერი კარგი მათთვის არის ცუდი”, – განაცხადა გურამ მაჭარაშვილმა.