ვენესუელის დამხობილი პრეზიდენტი ნიკოლას მადურო და მისი მეუღლე სილია ფლორესი ნიუ-იორკის სამხრეთ ოლქის სასამართლოში გადაიყვანეს, სადაც ისინი „ნარკოტერორიზმის“ ბრალდებით სასამართლოს პირველ სხდომაზე უნდა წარდგნენ.
როგორც CNN-ი წერს, ვენესუელის ლიდერი და მისი მეუღლე ბრუკლინის საგამოძიებო იზოლატორიდან გაძლიერებული დაცვის ქვეშ, ჯერ ვერტმფრენით, შემდეგ კი ჯავშანტექნიკით გადაიყვანეს. მედიით გავრცელებულ კადრებში ჩანს, რომ მადურო და ფლორესი შეიარაღებული პოლიციელებისა და ნარკოტიკებთან ბრძოლის სამმართველოს აგენტების გარემოცვაში. მათ ხელბორკილები ადევთ.
3 იანვრის ღამეს აშშ-მა ვენესუელაში სამხედრო ოპერაცია ჩაატარა, რის შედეგადაც ამერიკელმა სპეცრაზმელებმა პრეზიდენტი ნიკოლას მადურო და მისი მეუღლე, სილია ფლორესი შეიპყრეს და ქვეყნიდან გაიყვანეს. ისინი ნიუ-იორკში, სასამართლოს წინაშე „ნარკოტერორიზმის“ მიზნით შეთქმულების, კოკაინის შემოტანის, ასევე აშშ-ის წინააღმდეგ გამოსაყენებლად იარაღისა და ასაფეთქებელი მოწყობილობების შენახვის ბრალდებით წარდგებიან. აშშ-ის პრეზიდენტმა დონალდ ტრამპმა განაცხადა, რომ ვენესუელაში ხელისუფლების კანონიერ გადაცემამდე ქვეყანას აშშ უხელმძღვანელებს. ვენესუელის უზენაესმა სასამართლომ კი დელსი როდრიგესი ქვეყნის დროებით პრეზიდენტად დანიშნა.