ჩვენი მიზანი და მთავარი ამოცანა არის ჩვენი მოსახლეობის კეთილდღეობის ზრდა. ამისთვის საჭიროა ეკონომიკური ზრდა, რომელიც დღეს რეკორდული გვაქვს, ვინაიდან მივყვებით მშვიდობის პოლიტიკას და არა ბრიუსელიდან თავს მოხვეულ ესკალაციის პოლიტიკას, რომლისკენაც მოგვიწოდებდნენ, – განაცხადა შალვა პაპუაშვილმა.
საარსებო მინიმუმთან დაკავშირებულ კითხვაზე პასუხისას პარლამენტის თავმჯდომარემ აღნიშნა, რომ რუსეთისთვის სანქციების დაწესებას ევროკავშირი თბილისისგან ახლაც ითხოვს.
„2 თვის წინ იყო ევროკომისიის ანგარიში, რომელშიც პირდაპირ მოგვიწოდებენ, რომ რუსეთს დავუწესოთ სანქციები. რომ დავუჯეროთ ბრიუსელს და რუსეთს დავუწესოთ სანქციები, მერე ნახეთ თქვენ საარსებო მინიმუმი რა იქნება, მერე ნახეთ ფასების რა მდგომარეობა იქნება და მერე ნახეთ სიღარიბის ზღვარს მიღმა რამდენი ადამიანი იქნება“, – აღნიშნა პაპუაშვილმა.
მან ასევე ქვეყანაში არსებული ეკონომიკური მდგომარეობა „ნაციონალური მოძრაობის“ მმართველობის დროს დაფიქსირებულ მაჩვენებლებს შეადარა.
„ვხედავთ, რომ ის, რაც დატოვა „ნაციონალურმა მოძრაობამ“ იყო საქართველოს მოსახლეობის 30%, რომელიც სიღარიბის ზღვარს მიღმა იყო. დღეს ეს მაჩვენებელი 10%-ის გარშემოა, ისევე როგორც უმუშევრობა, რომელიც ასევე 30%-ის ფარგლებში იყო „ნაციონალური მოძრაობის“ დროს და ჩვენ ეს 10%-ის ფარგლებში ჩამოვიყვანეთ. იცით, ჩვენი საარჩევნო გეგმა, რომ 2028 წლისთვის როგორც სიღარიბის ზღვარს მიღმა მყოფი მოსახლეობის რაოდენობა, ისევე უმუშევრობა უნდა იყოს 3-5%-ის ფარგლებში“, – განაცხადა პაპუაშვილმა.