ვერეს ხეობაში დარგულმა ყველა ნარგავმა გაიხარა (ფოტორეპორტაჟი)

“ამ გაზაფზულზე  დედაქალაქის ხელმძღვანელებმა კარგი გადაწყვეტილება მიიღეს, როცა ვერეს ხეობაში, ახალი გზის გასწვრივ გამწვანების ფართომასშტაბიანი ღონისძიება განახორციელეს, რასაც ბევრი ოპონენტი გამოუჩნდა, ისმოდა საყვედურებიც, რომ ასე ახლო- ახლოს დარგულ ხეებს გაუჭირდებოდა გახარება,  თუმცა თავიდანვე ვამბობდი, ეს კარგად აპრობირებული მეთოდია და მსოფლიოს ბევრ ქალაქში მწვანე კედლები ასეა მოწყობილი,  კარგი მოვლისა და ყურადღების პირობებში  კი ნერგები ჩვენთანაც გაიხარებდა. ასეც მოხდა, თუმცა გაზაფხულზე სურათი კიდევ უფრო თვალსაჩინო იქნება, როცა ადაპტაცია დასრულდება და მწვანე ზოლი სულ სხვა ელფერს შესძენს ამ გარემოს. ეს იქნება ქალაქის სანიტარულ-ჰიგიენური მონაკვეთი, საიდანაც გასუფთავებულ ჰაერს მიიღებს მოსახლეობა. მოვა დრო, აქ საუკეთესო სასეირნო ადგილი მოეწყობა და ამ მწვანე ძეგლის შემქმნელების შრომასაც  დააფასებენ!

ალბათ, ბევრმა არ იცის, რომ ვერეს ხეობის გამწვანების იდეა ნიკო კეცხოველს ეკუთვნის – ჯერ კიდევ გასული საუკუნის სამოცდაათიან წლებში, უნივერსიტეტის პირველი კორპუსის ბაღის მოწყობის შემდეგ,  ზოოპარკისაკენ ჩამავალ ფერდობზე ტერასები უნდა გამწვანებულიყო, მერე კი, მთელი ვერეს ხეობა გმირთა მოედნიდან ბეთანიის ტყემდე დენდროლოგიურ პარკად ჰქონდა ჩაფიქრებული. ამიტომ, ეს დიდი მეცნიერისა და მამულიშვილის საუკეთესო  პროექტის განხორციელების დასაწყისადაც შეიძლება მივიჩნიოთ. დედაქალაქის ეს ტერიტორია ვერა-ვაკე -ბეთანია თბილისის ჯანსაღი ჰაერით მკვებავი არტერია უნდა გახდეს, ეს პატრიოტული საქმეა, პროექტი უნდა გაგრძელდეს, მუდმივად უნდა მოხდეს ზონის განახლება, შეივსოს ახალი მწვანე ნარგავებით. საქმე უკვე დაწყებულია და სტარტი – იმედისმომცემი.”