ლუქსემბურგი პალესტინის სახელმწიფოს აღიარებას გეგმავს. ამის შესახებ საპარლამენტო კომისიას პრემიერ-მინისტრმა, ლუკ ფრიდენმა და საგარეო საქმეთა მინისტრმა, ქსავიე ბატელმა განუცხადეს.
როგორც გამოცემა „პოლიტიკო“ ადგილობრივ მედიაზე დაყრდნობით წერს, ლუქსემბურგის მიერ საბოლოო გადაწყვეტილების მიღება მიმდინარე თვის ბოლოს ნიუ იორკში, გაერო-ს გენერალურ ასამბლეაზე იგეგმება.
არსებული ინფორმაციით, ლუქსემბურგი ამ ნაბიჯს სხვა რამდენიმე ქვეყანასთან კოორდინაციით გადადგამს, მათ შორის საფრანგეთსა და ბელგიასთან, რომლებიც ასამბლეაზე პალესტინის სახელმწიფოს აღიარების გამოცხადებას გეგმავენ.
გასულ კვირას ევროკომისიის პრეზიდენტმა, ურსულა ფონ დერ ლაიენმა განაცხადა, რომ ევროკავშირი ისრაელის წინააღმდეგ სანქციების დაწესების საკითხს განიხილავს. მისი თქმით, ევროკავშირი ისრაელთან ასოცირების შეთანხმების ნაწილობრივ შეჩერებასა და რამდენიმე ისრაელელი მინისტრისთვის სანქციების დაწესების საკითხებზე მოლაპარაკებებს გამართავს.