ამერიკა აპირებს, დასახულ მიზნებს ნებისმიერი გზით მიაღწიოს, ვისთანაც არ უნდა მოუწიოს წინააღმდეგობის გადალახვა – იქნებიან ეს პარტნიორები, თუ მოწინააღმდეგეები, – განაცხადა „დღის ქრონიკაში“ ანალიტიკოსმა, ამირან სალუქვაძემ გრენლანდიის გარშემო შექმნილ დაძაბულ ვითარებაზე საუბრისას.
მისივე თქმით, გრენლანდიასთან დაკავშირებით, ჯერჯერობით გადაწყვეტილი არაფერია, იმის მიუხედავად, რომ აშშ-ის პრეზიდენტმა გააკეთა განცხადება, რომ თითქოს ჩარჩო შეთანხმებას მიაღწიეს, თუმცა საზოგადოებამ იხილა გრენლანდიისა და დანიის სხვადასხვა თანამდებობის პირის განცხადებები სუვერენიტეტის დაცვაზე.
„დიდი ალბათობით, ტრამპი ალბათ, გააგრძელებს თავისი დასახული მიზნისკენ სვლას. შესაძლოა, მთლიანად თუ არა, გარკვეულ მიზნებს მიაღწევს. ეს ტრამპის ხელწერაა და მას ახასიათებს, რომ იგი ითხოვს მაქსიმუმს და სადღაც, შუალედზე შეჯერდებიან-ხოლმე. შესაძლოა, გრენლანდიასთან მიმართებით ეს იყოს რაღაც შუალედური ეტაპი. საბოლოო ჯამში, ეს ტრამპის პერიოდში მოხდება თუ ტრამპის შემდეგ, ამერიკა მაინც წავა იმ გზით, რაც ტრამპს აქვს გაცხადებული, რადგან ეს არ არის მხოლოდ ტრამპის თემა – ეს მიზნები ტრამპამდეც იყო გაცხადებული. მათ შორის, ნახევარსაუკუნეზე მეტი ხნის წინ, კონკრეტულად გრენლანდიაზე. არც ამერიკასა და დანიას შორის არის ეს პირველი შემთხვევა. ისტორიაში ცნობილია ფაქტი, რომ 1917 წელს დანიისგან ვირჯინიის კუნძულები შეიძინა 25 მლნ დოლარად. ამერიკას თავის ისტორიაში სხვა მსგავსი ფაქტებიც აქვს მექსიკასთან და ასე შემდეგ.
ვფიქრობ, ტრამპის შემდეგაც, თუ ის ვერ მიაღწევს ამ ეტაპზე დასახულ მიზნებს, აშშ ამ გზას გააგრძელებს – ვინც არ უნდა მოვიდეს ხელისუფლებაში, დემოკრატები იქნებიან თუ რესპუბლიკელები“, – განაცხადა სალუქვაძემ.