აშშ-ის პრეზიდენტმა, დონალდ ტრამპმა სამშაბათს გამოცემა AXIOS-ისთვის მიცემულ ინტერვიუში განაცხადა, რომ ახლო აღმოსავლეთში მეორე ავიამზიდის დამრტყმელი ჯგუფის გაგზავნას განიხილავს, რათა ირანთან მოლაპარაკებების ჩავარდნის შემთხვევაში, სამხედრო მოქმედებებისთვის მზად იყოს.
„ან შეთანხმებას მივაღწევთ, ან მოგვიწევს ძალიან მკაცრი ნაბიჯების გადადგმა, როგორც წინა ჯერზე“, – აღნიშნა დონალდ ტრამპმა.
მისი თქმით, აშშ-ირანის მოლაპარაკებების მეორე რაუნდის გამართვას მომავალ კვირას ელოდება.
„ჩვენ გვყავს არმადა, რომელიც იქით მიემართება და შესაძლოა კიდევ ერთი გაიგზავნოს“, – განაცხადა ტრამპმა და დასძინა, რომ ის „ფიქრობს“ კიდევ ერთი ავიამზიდის დამრტყმელი ჯგუფის გაგზავნაზე.
თუმცა, ტრამპმა ოპტიმიზმი გამოხატა დიპლომატიური გზის მიმართ და აღნიშნა, რომ ირანს „ძალიან სურს შეთანხმების მიღწევა“ და სამხედრო მუქარის გამო, ბევრად უფრო სერიოზულად არის ჩართული პროცესში, ვიდრე წინა მოლაპარაკებების დროს.