უკრაინამ ჩუმად დაშალა საერთაშორისო ლეგიონი, – უკრაინული მედიის თანახმად, ამის შესახებ ფრანგული გამოცემა Le Monde-ი წერს.
უკრაინული მედიის მიხედვით, 2025 წლის ბოლოს უკრაინამ ფაქტობრივად დაიწყო საერთაშორისო ლეგიონის დაშლა, რომელიც შეიქმნა პრეზიდენტ ვოლოდიმირ ზელენსკის ბრძანებით 2022 წელს, რუსეთის სრულმასშტაბიანი შეჭრიდან რამდენიმე დღეში.
გავრცელებული ცნობით, უცხოელი მებრძოლები გადაჰყავთ რეგულარული არმიის მოიერიშე ლეგიონებში, რომლებიც ყველაზე სახიფათო საბრძოლო მისიებს ასრულებენ.
როგორც მედია წერს, უკრაინის გენერალური შტაბის გადაწყვეტილება ფარულად 2025 წლის 31 დეკემბერს გამოცხადდა. ამავდროულად, ლეგიონის მე-2 ბატალიონმა დროებითი გადავადება 15 თებერვლამდე მიიღო, თუმცა მისი პირადი შემადგენლობა უკვე გადაყვანილი იყო 129-ე ტერიტორიული თავდაცვის ბრიგადის 253-ე მოიერიშე ლეგიონში.
„ეს შოკი იყო. გვითხრეს: „ჩაალაგეთ ბარგი და იმავე დღეს წადით კრივოი როგში“, – ამბობს 45 წლის დანიელი ფარერის კუნძულებიდან, მეტსახელად „ვიკინგი“, რომელიც ლეგიონს 2023 წელს შეუერთდა.
მისი თქმით, გადაყვანის შემდეგ სამსახურის პირობები მკვეთრად გაუარესდა.
„ერთი კვირის განმავლობაში ყაზარმებში ვართ გამოკეტილი წყლისა და ინტერნეტის გარეშე. არ არის არც საწვრთნელი შეკრებები და არც წვრთნები. ყველა დემორალიზებულია და ჩვენი ბევრი თანამებრძოლი წავიდა“, – ამბობს დანიელი.
საერთაშორისო ლეგიონის მე-2 ბატალიონის შტაბის უფროსი ანდრეი სვაკი სარდლობის გადაწყვეტილებას სტრატეგიულ შეცდომას უწოდებს.
„საერთაშორისო ლეგიონის დაშლა რესურსების წარმოუდგენელი ფლანგვაა დანაყოფში, სადაც ყველა ოფიცერი ორენოვანია. ჩვენ ლეგიონერებს ინოვაციურ თავდაცვით ტაქტიკაში ვავარჯიშებდით და ახლა მათ შეტევით დანაყოფებში გაგზავნიან, რაც სხვა მისიაა“, – აღნიშნავს სვაკი.
უკრაინული მედიის თანახმად, ლეგიონში უცხოელთა რაოდენობის შესახებ ოფიციალური მონაცემები არ საჯაროვდება. 2022 წლიდან რამდენიმე ათასმა მოხალისემ გააფორმა კონტრაქტი, თუმცა დანაყოფმა ჯერ კიდევ ვერ მიაღწია მოსალოდნელ 20 000-კაციან შემადგენლობას. უკრაინის შეიარაღებულ ძალებში უცხოელები იღებენ იმავე ოდენობის ხელფასს, რასაც უკრაინელი ჯარისკაცები, მაგრამ აქვთ უფლება, შეწყვიტონ კონტრაქტები ექვსთვიანი სამსახურის შემდეგ, რამაც პერსონალის მნიშვნელოვანი გადინება გამოიწვია.