ყველამ ძალიან კარგად ვიცით, რომ ეს პროცესები, რაც ხდება ჩვენს ქვეყანაში, საზოგადოების დაპირისპირების მცდელობა, პოლარიზაციის გაღვივება, რევოლუციების მოწყობა, რა თქმა უნდა, ყველაფერი არის გარედან თავსმოხვეული პროცესები, – განაცხადა გადაცემაში „იმედი LIVE“ დედაქალაქის მერმა, პარტია „ქართული ოცნების“ გენერალურმა მდივანმა კახა კალაძემ.
კალაძის თქმით, ნებისმიერი თავმოყვარე ქვეყანა გადადგამს ისეთ ნაბიჯს, რომელსაც დღეს დგამს საქართველოს ხელისუფლება.
„მათი მოთხოვნებით და მათი განცხადებებით ფული უნდა შემოიტანონ ქვეყანაში. ჩვენ, რა თქმა უნდა, თვალი უნდა დავხუჭოთ ამ ყველაფერზე. აქ ფული უნდა დახარჯონ პოლიტიკაში, პირდაპირ ჩაერიონ ქვეყნის შიდა საქმეებში, შექმნან ექსტრემისტული ჯგუფები, შექმნან არასამთავრობო ორგანიზაციები, არასამთავრობო სექტორი, რომლებიც ვითომ რაღაც კეთილ საქმეებს აკეთებენ და რეალურად, ნებისმიერ დროს, როდესაც მოუნდებათ მთავრობის, ხელისუფლების აყირავება, გამოიყენონ მათ მიერ დაფინანსებული ხალხი. ვერ მოხდება ეს, დამთავრდა.
მიუხედავად იმისა, რომ ჩვენ კანონებს ვიღებთ, აგერ რამდენიმე თვის წინ ერთ-ერთი დეპუტატი გამოვიდა უცხოეთიდან, პირდაპირ თქვა, ჩვენ შავ ხვრელებს ვეძებთ იმისთვის, რომ ქვეყანაში თანხები შევიტანოთო. წარმოუდგენელია ეს დამოკიდებულება. პატარები არავინ ვართ, ბავშვები არ ვართ და ყველამ ძალიან კარგად ვიცით, რომ ეს პროცესები, რაც ხდება ჩვენს ქვეყანაში, საზოგადოების დაპირისპირების მცდელობა, პოლარიზაციის გაღვივება, რევოლუციების მოწყობა, რა თქმა უნდა, ყველაფერი არის გარედან თავსმოხვეული პროცესები, გარედან მართული პროცესები. ცდილობენ, რომ ქვეყანაში შემოიტანონ თანხები.
ამდენი ხნის განმავლობაში შემოჰქონდათ არასამთავროვო ორგანიზაციების გავლით, გვეუბნებოდნენ, რომ სადღაც რეგიონში ვითომ კარგ პროექტს ახორციელებდნენ, დახარჯავდნენ იქ ერთი ათი ათასს და უმეტესობა, ათეულობით, ასეულობით მილიონი იხარჯებოდა ქართულ პოლიტიკაში. წარმოუდგენელია.
ნებისმიერი თავმოყვარე ქვეყანა გადადგამს ისეთ ნაბიჯს, რომელსაც დღეს დგამს საქართველოს ხელისუფლება. არავის აქვს შიდა პოლიტიკურ საქმიანობაში ჩარევის უფლება, მითუმეტეს თანხების დახარჯვა. ჩვენ ყველაფერს გავაკეთებთ, რომ აღნიშნული მიმართულება შევაჩეროთ და არავის მივცეთ შესაძლებლობა დააფინანსოს მოქალაქეების ერთმანეთთან დაპირისპირება, რევოლუციური სცენარები და ა.შ.“ – აღნიშნა კახა კალაძემ.