აშშ-ის კონგრესის შეიარაღებული ძალების კომიტეტის წევრმა, კონგრესმენმა მაიკ ტერნერმა აღნიშნა, რომ ამერიკის შეერთებული შტატების მიზანი ირანში ხელისუფლების შეცვლა არ არის. ამ თემაზე მან CBS News-სთან ისაუბრა.
წამყვანის კითხვაზე, იყო თუ არა ავიადარტყმა, რომელსაც ირანის უზენაესი ლიდერი აიათოლა ხამენეი ემსხვერპლა, აშშ-ის მიერ განხორციელებული, მან უპასუხა, რომ ეს საკითხი სახელმწიფო მდივან მარკ რუბიოსთან განიხილა.
„მისგან ძალიან მკაფიო პასუხი მივიღე, რომ ხამენეი ჩვენი სამიზნე არ ყოფილა და ჩვენი მიზანი ირანში ხელისუფლების შეცვლა არ არის. ძალიან მნიშვნელოვანია ეს ასპექტი, რომ შეერთებული შტატები ირანში რეჟიმის შეცვლას არ ცდილობს. ჩვენი ხედვით, ის, რაც შეერთებული შტატების პრეზიდენტმა განახორციელა, უკავშირდებოდა იმ გარდაუვალ საფრთხეს, რომელიც მან თავის განცხადებაში აღწერა და, ვფიქრობ, მისი რეაქცია და ეს მიმართვა შეერთებული შტატებისადმი მნიშვნელოვანი ასპექტია“, – განაცხადა კონგრესმენმა.
28 თებერვალს აშშ-მა და ისრაელმა ირანზე იერიში მიიტანეს. შედეგად დაიღუპნენ ქვეყნის უზენაესი ლიდერი, აიათოლა ალი ხამენეი და სხვა მაღალჩინოსნები. საპასუხოდ, ირანი უკვე მესამე დღეა, დრონებითა და რაკეტებით უტევს ისრაელს, ისევე, როგორც აშშ-ის მოკავშირე ქვეყნებს სპარსეთის ყურეში.