ვიმედოვნებთ, რომ ახალი ადმინისტრაციის პირობებში, პირველ რიგში, ქართულ-ამერიკული ურთიერთობები კიდევ უფრო გაღრმავდება და აყვავდება, და მეორე – ჩვენ ერთად დავდგებით სუვერენიტეტის, დემოკრატიის, სიტყვის თავისუფლებისა და არჩევნების დასაცავად ჩვენს ქვეყნებში, – განაცხადა პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ სუვერენული ერების ალიანსის კონფერენციაზე.
„დიდი პატივი და სიამოვნებაა აქ ყოფნა. მე ვარ საქართველოს პარლამენტის საგარეო ურთიერთობათა კომიტეტის თავმჯდომარე და წარმოვადგენ მმართველ პარტიას – „ქართულ ოცნებას“.
ჩვენი ქართული ოცნებაა, გვქონდეს სრული სუვერენიტეტი ჩვენს ქვეყანაზე. ჩვენ ვართ ნაწილობრივ ოკუპირებული ქვეყანა – ჩვენი ტერიტორიების 20% ოკუპირებულია რუსეთის ფედერაციის მიერ, ამიტომ ჩვენი ოცნებაა ტერიტორიული მთლიანობის აღდგენა და ჩვენი ხალხის ეკონომიკური კეთილდღეობის უზრუნველყოფა. შესაბამისად, ჩვენ მიგვაჩნია, რომ ხალხის სუვერენიტეტსა და სუვერენულ გადაწყვეტილებებს პატივი უნდა ვცეთ.
სამწუხაროდ, მას შემდეგ, რაც თავმჯდომარედ ამირჩიეს, რაც ექვსი წლის წინ მოხდა, ჩვენ არაერთხელ გავხდით მემარცხენე რადიკალური ჯგუფების თავდასხმის ობიექტები როგორც საქართველოში, ასევე დასავლეთის მხარდაჭერით. ჩვენ ვიყავით ჩვენს არჩევნებსა და შიდა საქმეებში უცხოური ჩარევის მსხვერპლნი. როდესაც უცხოურ ჩარევაზე ვსაუბრობ, არ ვგულისხმობ მხოლოდ რუსეთის ფედერაციას; ვგულისხმობ ასევე არასამთავრობო ორგანიზაციებს, რომლებიც ფინანსდებიან აშშ-დან და ევროპიდან, და რომლებიც რეალურად მუშაობდნენ დემოკრატიულად არჩეული ხელისუფლების ლეგიტიმაციის შელახვაზე, ასევე არეულობის, ძალადობისა და, საბოლოო ჯამში, ხელისუფლების ძალადობრივი დამხობის წახალისებაზე.
წინა პანელის მონაწილეებმა აღნიშნეს, რომ მათი შვილები განიცდიან შევიწროებას მათი შეხედულებების გამო. ჩვენ გვყავს საქართველოს დელეგაციაში ქალი პოლიტიკოსი, რომელიც ასევე გახდა თავდასხმის მსხვერპლი თავის შვილებთან ერთად, როდესაც მას მემარცხენე რადიკალები მისი აზრის გამო დაესხნენ თავს. ეს არის ძალიან სერიოზული საფრთხე, რომლის წინაშეც ყველა ვდგავართ და, სამწუხაროდ, საქართველოში ეს პირადად გამოვცადეთ.
რატომ ვარ აქ? ახალი ადმინისტრაციის არჩევასთან ერთად, ჩვენ გვაქვს დიდი იმედი, რადგან იდეოლოგიურად ერთსა და იმავე პოზიციაზე ვართ. ჩვენი ღირებულებები – ქრისტიანული და ტრადიციული ფასეულობები – არის ჩვენი საშინაო და საგარეო პოლიტიკის საფუძველი. შესაბამისად, ვიმედოვნებთ, რომ ახალი ადმინისტრაციის პირობებში, პირველ რიგში, ქართულ-ამერიკული ურთიერთობები კიდევ უფრო გაღრმავდება და აყვავდება, და მეორე – ჩვენ ერთად დავდგებით სუვერენიტეტის, დემოკრატიის, სიტყვის თავისუფლებისა და არჩევნების დასაცავად ჩვენს ქვეყნებში“, – აღნიშნა სამხარაძემ.