სოციალისტი პრემიერ-მინისტრის, პედრო სანჩესის განცხადებით, იწყება არალეგალი მიგრანტების მდგომარეობის მოწესრიგების მასშტაბური გეგმის ხორცშესხმა, რამაც, შესაძლოა, „თითქმის ნახევარ მილიონ ადამიანს“ მოუტანოს სარგებელი და სტიმული მისცეს ქვეყნის ეკონომიკას.
მთავრობის მეთაურის ამ განცხადებამ დიდი ხმაური გამოიწვია ესპანეთსა და მთელ ევროპაში, მითუმეტეს მას შემდეგ, რაც ოთხშაბათს, 15 აპრილს, შესაბამისი დეკრეტი ოფიციალურ ჟურნალში გამოქვეყნდა. ესპანეთი ასობით ათასი არალეგალი მიგრანტის სამართლებრივ ლეგალიზებას აპირებს. ამისთვის მათ უნდა დაამტკიცონ, რომ ქვეყანაში მინიმუმ ექვსი თვეა ცხოვრობენ და არ აქვთ ნასამართლობა. ათასობით ადამიანი უკვე დგას რიგში ადმინისტრაციულ ოფისებთან, საჭირო საბუთების შესაგროვებლად.
ესპანელი ხალხისადმი მიმართვაში, პედრო სანჩესმა ამ მასშტაბური ლეგალიზების გეგმას „აუცილებლობა“ უწოდა და აღნიშნა, რომ მისი განხორციელება მიზანშეწონილია ესპანეთის მოსახლეობის დაბერებიდან გამომდინარე და ეროვნული ეკონომიკის მხარდასაჭერად, რომელიც სიდიდით მეოთხეა ევროზონაში და ამჟამად ერთ-ერთი ყველაზე დინამიურია ევროპაში.
„საბუთების გარეშე ყოფნა ტვირთია“
სააგენტოს წინ, რომელიც მადრიდის სამგზავრო ბარათის შევსების სერტიფიკატს გასცემს, ათამდე ადამიანს მოუყრია თავი. ეს დოკუმენტი ამჟამად ათიათასობით მიგრანტს საშუალებას აძლევს, დაამტკიცოს, რომ ესპანეთში, სულ მცირე, ექვსი თვის განმავლობაში უწყვეტად ცხოვრობს. 39 წლის პერუელი ჯენიფერი ამბობს: „მალე ოფიციალურად მუშაობას შევძლებ, ახლა კი არალეგალურად ვმუშაობ… ეს საშუალებას მოგვცემს, უფრო დიდ ბინაში გადავიდეთ“.
„ჩემთვის ეს ძალიან მნიშვნელოვანია, – ამბობს 24 წლის შაკიბი ბანგლადეშიდან – საბუთების არქონა ტვირთია ჩემსთვის და ჩემი ოჯახისთვის. თუ საბუთებს ავიღებ, ჩემი ცხოვრება შეიცვლება და ჩემი ოჯახი უკეთესად იქნება. ამჟამად შეკვეთილ საკვებს მისამართებზე ვარიგებ. როგორც კი საბუთები მექნება, სამსახურს შევიცვლი“.
ხელისუფლება და საზოგადოებრივი ორგანიზაცების მიიჩნევენ, რომ იმ ადამიანთა რაოდენობა, რომლებსაც ლეგალიზების გეგმა შეეხება, დაახლოებით 500 ათასია, თუმცა ზოგიერთი ვარაუდით, ეს ციფრი 800 000-ს აღწევს. უკანონი მიგრანტების ლეგალიზებას მხარს უჭერენ მემარცხენეები, ასევე დამსაქმებლები და კათოლიკური ეკლესია. თავის მხრივ, მემარჯვენეები და ულტრა-მემარჯვენეები „მიზიდვის ეფექტის“ რისკზე საუბრობენ და აცხადებენ, რომ ეს შეიძლება სხვებისთვის გახდეს სიგნალი ან მოტივაცია, რომ უფრო ბევრმა ადამიანმა სცადოს ამ ქვეყანაში შემოსვლა ან ამ სისტემით სარგებლობა.
https://www.franceinfo.fr/monde/espagne/temoignages-ma-vie-va-changer-et-ma-famille-ira-mieux-l-espagne-lance-un-vaste-plan-de-regularisation-des-sans-papiers_7939532.html