ნატოს გენერალურმა მდივანმა, მარკ რუტემ განაცხადა, რომ ჩრდილოატლანტიკური ალიანსიდან ამერიკის შეერთებული შტატბის გასვლა ნაკლებად სავარაუდოა.

„არ მგონია, რომ აშშ-მა ნატო დატოვოს“, – განაცხადა რუტემ.

თუმცა, როგორც გენმდივანმა დასძინა, ნათელია, რომ „ჩვენ უფრო ძლიერი ნატოს ფარგლებში, მეტად ძლიერი ევროპა გვჭირდება“.

„პრეზიდენტი ტრამპი ნამდვილად იმედგაცრუებულია ნატოს ზოგიერთი წევრის გამო. და მე მისი იმედგაცრუების მესმის“, – დასძინა რუტემ.

მან ევროპის ქვეყნებს სამხედრო მრეწველობის გაძლიერებისკენ მოუწოდა.

„ამას ჩვენი შემაკავებელი ძალისა და თავდაცვის მხარდაჭერისთვის გადამწყვეტი მნიშვნელობა აქვს“, – თქვა რუტემ.

ნატოს გენერალური მდივანი აგრეთვე დარწმუნებულია, რომ შეერთებული შტატები ევროპას ბირთვული ქოლგის გარეშე არ დატოვებს.

„ამერიკული ბირთვული ქოლგა – აქ, ევროპაში უსაფრთხოების მთავარი გარანტიაა. დარწმუნებული ვარ, რომ ეს ასე იქნება“, – აღნიშნა მან.