უკრაინის პრეზიდენტმა, ვოლოდიმირ ზელენსკიმ ერთ-ერთ ტელეინტერვიუში გამოთქვა მოსაზრება, რომ რუსეთის მიერ ინტერნეტზე წვდომის შეზღუდვა, შესაძლოა, ბალტიის ქვეყნებზე თავდასხმისთვის მობილიზებას უკავშირდებოდეს.
უკრაინის პრეზიდენტის აზრით, მობილიზაციის მიზანი შეიძლება იყოს ფართომასშტაბიანი თავდასხმა უკრაინაზე ან, როგორც ამის ალტერნატივა – ბალტიის ქვეყნებზე.
იმავე სატელევიზიო ინტერვიუში დასმულ კითხვაზე, თუ რუსეთი ბალტიის ქვეყნებს თავს დაესხმება, აამოქმედებს თუ არა ნატო მე-5 მუხლს, რომელიც კოლექტიური თავდაცვას უზრუნველყოფს, ზელენსკიმ ეჭვი გამოთქვა.
„ვფიქრობ, რომ შესაძლოა ყველა ქვეყანამ არ მოისურვოს [ბალტიის ქვეყნების] მხარდაჭერა, მაგრამ ჩემი აზრით, ნატო-ს არჩევანი არ აქვს, წინააღმდეგ შემთხვევაში – ის აღარ იარსებებს. მათ ერთად უნდა იმოქმედონ და პასუხი გასცენ იმას, რისი გაკეთებაც პოტენციურად პუტინს შეუძლია“, – აღნიშნა ზელენსკიმ.
ესტონელი პოლიტიკოსების აზრით, ზელენსკი, ასეთი განცხადებით, კრემლის ნარატივს იმეორებს და მსგავსი რიტორიკა მოკავშირეებს შორის თანამშრომლობას ხელს არ უწყობს.
ესტონეთის საგარეო საქმეთა მინისტრმა, მარგუს ცაჰკნამ ესტონეთის საზოგადოებრივ მაუწყებელს (ERR) განუცხადა, რომ 2022 წელს რუსეთის მიერ სრულმასშტაბიანი ომის დაწყების შემდეგ, უკრაინამ არაერთხელ გამოთქვა ვარაუდი, რომ ის შეიძლება არ იყოს ერთადერთი ქვეყანა, რომელსაც მოსკოვი თავს დაესხმება. უფრო მეტიც, – ამ კუთხით ცალსახად იყვნენ ნახსენები ბალტიისპირეთის ქვეყნები.
თუმცა, ცაჰკნას თქმით, მოკავშირის ასეთი განცხადებები თანამშრომლობას ხელს არ უწყობს. მან ასევე აღნიშნა, რომ ზელენსკის სიტყვებში სიმართლე არ არის.
„ასეთი განცხადებები არ შეესაბამება ჩვენს სადაზვერვო ინფორმაციას ან საფრთხის სურათის ჩვენეულ შეფასებას. ჩვენ ვერ ვხედავთ, რომ რუსეთი ძალების კონცენტრირებას ახდენს, ან ნატო-ზე, ბალტიის ქვეყნების ჩათვლით, სამხედრო თავდასხმისთვის ემზადება; პირიქით – რუსეთს არ აქვს ძლიერი პოზიციები არც უკრაინის ფრონტზე და არც ეკონომიკური კუთხით“, – განაცხადა ცაჰკნამ.
მისი აზრით, ნატო-ს მე-5 მუხლის ეროზიაზე საუბრი საფუძველს მოკლებულია.
„რა თქმა უნდა, ეს ძალას არ მატებს ალიანსს, როდესაც აშშ-ის პრეზიდენტი ტრამპი ნატო-ს კონტექსტში ევროპელ მოკავშირეებს აკრიტიკებს. თუმცა, ეს არ ნიშნავს იმას, რომ ნატო-ს არ შეუძლია რეაგირება, თუ რომელიმე წევრ სახელმწიფოზე თავდასხმა განხორციელდება. ნატო ამას აუცილებლად უპასუხებს“, – დასძინა ცაჰკნამ და ხაზგასმით აღნიშნა, რომ ალიანსის გარდა, ესტონეთს საკუთარი თავდაცვის შესაძლებლობებიც გააჩნია.
მიჰკელსონი: ზელენსკი ნატო-ს ძირს უთხრის
ესტონეთის რიიგიკოგუს (პარლამენტის) საგარეო საქმეთა კომიტეტის თავმჯდომარემ, მარკო მიჰკელსონმა ასევე ხაზი გაუსვა, რომ უკრაინის ხელმძღვანელობა უკვე პირველად არ საუბრობს იმაზე, რომ რუსეთის მომდევნო სამიზნე ბალტიის ქვეყნები იქნებიან.
„ევროპას თითქოს მიანიშნებენ: ნახეთ, თუ ჩვენ უფრო სუსტ მდგომარეობაში აღმოვჩნდებით ან დავმარცხდებით, შემდეგი თქვენ იქნებით, პირველ რიგში კი – ბალტიის ქვეყნები. ეს აშკარად შემაშფოთებელია და აძლიერებს რუსეთის ნარატივს იმის შესახებ, რომ ის იმარჯვებს, წინ მიიწევს, თქვენ კი უკან იხევთ და მარცხდებით“, – განაცხადა მიჰკელსონმა.
მიჰკელსონის თქმით, ეს საკითხი უკრაინელებთან შეხვედრებზეც დაისვა და, მისი აზრით, სერიოზული საფრთხის შემთხვევაში, მოკავშირეებმა მედიაში კი არ უნდა შექმნან აჟიოტაჟი, არამედ მსგავსი გზავნილები ერთმანეთში გაცვალონ. „მედიით გადაცემული გზავნილები ხშირად სპეკულაციის დონეზე რჩება“, – დასძინა მან.
„ზელენსკიმ ხაზგასმით აღნიშნა, რომ ნატო-მ ერთიანობა უნდა შეინარჩუნოს და პუტინის ქმედებებზე რეაგირებისთვის მზად უნდა იყოს. მე ვეთანხმები იმას, რომ არავის გაუკეთებია უფრო მეტი მე-5 მუხლის სანდოობის შესარყევად, ვიდრე აშშ-ის პრეზიდენტ დონალდ ტრამპს, მაგრამ უკრაინის პრეზიდენტიც ნაწილ-ნაწილ აცლის მას ძალას,“ – აღნიშნა მიჰკელსონმა.
ესტონეთის საგარეო საქმეთა კომიტეტის ხელმძღვანელმა დასძინა, რომ უკრაინის პრეზიდენტმა რუსეთის ნარატივების გავრცელებას ხელი არ უნდა შეუწყოს.
ჰელმე: ეს ნარატივი თავად შევქმენით
ესტონეთის კონსერვატიული სახალხო პარტიის (EKRE) ლიდერის, მარტინ ჰელმეს თქმით, ზელენსკის გზავნილში ახალი არაფერია, თუმცა მისივე მტკიცებით, ამ ნარატივის შექმნაში წვლილი თავად ესტონეთმაც შეიტანა.
„მეჩვენება, რომ მათ [დიპლომატებმა] თავად შექმნეს ეს ნარატივი. უკრაინაში ომის დაწყების დღიდან მმართველი „რეფორმების პარტიის“ მთავარი გზავნილი ის არის, რომ ხალხი რუსეთით გონების დაკარგვამდე უნდა დააშინონ, შემდეგ კი, ამ შიშის საფარქვეშ, ყველა გადასახადი გაზარდონ და შიდა პოლიტიკური ოპოზიცია კრემლის აგენტებად წარმოაჩინონ“, – განაცხადა ჰელმემ.
მისი თქმით, ზელენსკის ასეთი განცხადებების მიზანი სწორედ შიშის კლიმატის შექმნაა, რაც მოკავშირეებს მისთვის მეტი აღჭურვილობის მიწოდებისკენ უბიძგებს.
„უსასრულო სტრესსა და შიშამდე ხალხის მიყვანა აღარ გამოდგება იმისთვის, რომ ყველამ უფრო ფოკუსირებულად იმოქმედოს ომის საფრთხის თავიდან ასაცილებლად; ეს რიტორიკულ საფრთხობელად იქცა“, – ამბობს ჰელმე.
პევკური: უკრაინას მეტი დახმარების მიღება სურს
ესტონეთის თავდაცვის მინისტრმა, ჰანო პევკურმა განაცხადა, რომ სოციალურ მედიაში მრავალი სპეკულაცია შეიძლება მოიძებნოს. „უკრაინის შემთხვევაში, გასათვალისწინებელია, რომ მათი მიზანი დასავლელი მოკავშირეებისგან მეტი დახმარების მიღება და, შესაბამისად, იმაზე მინიშნებაა, რომ უკრაინისთვის დახმარების გაწევა დასავლეთსაც ეხმარება რუსეთის შეკავებაში“, – განმარტა მან.
ინტერნეტ-გამოცემა „დელფის“ ინფორმაციით, პევკურმა დაადასტურა, რომ ესტონეთი ყურადღებით აკვირდება რუსეთში მიმდინარე მოვლენებს. „რუსეთის ქმედებები ამ მომენტში აშკარად მხოლოდ უკრაინას უკავშირდება და ჩვენსკენ არ არის მომართული“, – დასძინა მან.
https://news.err.ee/1610001283/estonian-politicians-zelenskyy-s-remarks-on-the-baltics-echo-kremlin-line