ლიეტუვის მთავრობამ მოიწონა ინიციატივა, რომელიც ამ ქვეყნის მოქალაქეებისთვის საზღვარგარეთ სამოქალაქო ან სამხედრო სამსახურში ჩარიცხვის პროცედურების გამარტივებას ითვალისწინებს.
„სახელმწიფოსთვის მნიშვნელოვანია იცოდეს, უცხოეთის რომელ ქვეყნებში მსახურობენ ლიეტუვის მოქალაქეები და რა თანამდებობები უკავიათ მათ. შესაბამისად, ყველა მოქალაქისთვის დგინდება ნებართვის აღების ვალდებულება. ეს სახელმწიფოს მიზნებიდან გამომდინარეობს. კერძოდ, მან უნდა იცოდეს, სად მსახურობენ მისი მოქალაქეები და წინასწარ აღკვეთოს საფრთხეები“, – ნათქვამია პროექტის განმარტებით ბარათში.
მთავრობის ინიციატივის თანახმად, შინაგან საქმეთა მინისტრი გასცემს შესაბამის ნებართვებს, თუ ლიეტუვის მოქალაქე მოისურვებს, იმსახუროს პოლიტიკოსად, ჩინოვნიკად ან სხვა თანამდებობებზე, რომლებიც მართლმსაჯულებასთან, საჯარო ადმინისტრირებასთან ან საწესდებო სამსახურთან არის დაკავშირებული და უცხო ქვეყნის მოქალაქეობის ან ერთგულების ფიცის მიღებას საჭიროებს. იგივე პროცედურა გავრცელდება სამხედრო სამსახურის შემთხვევაშიც. ლიეტუვის შინაგან საქმეთა სამინისტრომ მაგალითად მოიყვანა საფრანგეთის უცხოური ლეგიონი, სადაც სამსახური მოქალაქეობას ან ფიცს არ მოითხოვს; ასეთ შემთხვევებში, ლიეტუვის მოქალაქეებს ნებართვა არ დასჭირდებათ. ნებართვა არ გაიცემა იმ შემთხვევაში, თუ სამსახური საფრთხეს უქმნის ლიეტუვის უსაფრთხოებას, ეწინააღმდეგება ეროვნულ ან საგარეო პოლიტიკურ ინტერესებს, ან თუ პირს არ აქვს გავლილი სავალდებულო სამხედრო სამსახური. კანონპროექტი ასევე ითვალისწინებს, რომ ლიეტუვის მოქალაქეობა შეიძლება ჩამოერთვათ არა მხოლოდ მიმდინარე პერიოდში უნებართვო სამსახურისთვის, არამედ წარსულში მსგავსი საქმიანობისთვისაც. ამჟამად ასეთ ნებართვებს მთავრობა გასცემს. მიმდინარე წელს ლიეტუვის 20-ზე მეტ მოქალაქეს მიეცა უფლება, ევროპული და სხვა სახელმწიფოების სამხედრო ძალებში იმსახუროს.
https://www.lrt.lt/en/news-in-english/19/2906352/lithuania-eases-procedure-for-citizens-to-serve-in-foreign-armies