გემი რომ იძირება და ვირთხები გარბიან, ის სიტუაციაა. მეათედ თუ მეთერთმეტედ მოძებნილი ფანჩატური კვლავ თავზე ენგრევათ და ერთმანეთისკენ თითის გაშვერით ცდილობენ, ამ ლაბირინთიდან თავი გამოიძვრინონ, – განაცხადა საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა ოპოზიციის ალიანსში არსებულ დაპირისპირებაზე საუბრისას.
მისი თქმით, რადიკალებს ხელისუფლებაში დაბრუნების არანაირი პერსპექტივა არ აქვთ.
„გემი რომ იძირება და ვირთხები გარბიან გემიდან, დაახლოებით ის სიტუაციაა, თუმცა ეს გემი დიდი ხანია ჩაძირულია. არანაირი პერსპექტივა, რომ საქართველოში რადიკალიზმი კვლავ აღორძინდეს და მეხუთე კოლონა ხელისუფლებაში მოიყვანონ, არ აქვთ. ამიტომაც ეს მდარე ე.წ. პოლიტიკური სახეები ერთმანეთისკენ თითს იშვერენ. ერთმანეთს აბრალებენ საკუთარ უუნარობას. ისინი უცხო ქვეყნის აგენტურას წარმოადგენენ საქართველოში. ეს ყველაფერი მეტყველებს იმაზე, რომ როდესაც უკვე მეათედ თუ მეთერთმეტედ მოძებნილი ფანჩატური კვლავ თავზე ენგრევათ, ერთმანეთის მიმართ თითის გაშვერით ცდილობენ, ამ ლაბირინთიდან თავი გამოიძვრინონ“, – განაცხადა დავით მათიკაშვილმა.
ოპოზიციურ ალიანსში ისევ დაპირისპირებაა. „ფედერალისტები“ „ნაციონალურ მოძრაობას“ ალიანსის წესების დარღვევაში ადანაშაულებენ და ამბობენ, რომ ისინი ალიანსიდან თავს თავად ირიცხავენ. ამის პასუხად „ნაციონალურ მოძრაობაში“ ამბობენ, რომ მათი ყოფნა ალიანსში არავის გადასაწყვეტი არ არის.