ევროკავშირი 90 მილიარდი ევროს ოდენობის სესხის ნაწილის გაცემას უკრაინის მიერ ფინანსური მდგომარეობის გაუმჯობესების პირობას დაუკავშირებს, – წერს უკრაინული გამოცემა The Kyiv Independent-ი.
„ეს კიდევ უფრო ზრდის ქვეყანაზე ზეწოლას, რათა მან გაატაროს ის პოლიტიკურად სენსიტიური რეფორმები, რომლებსაც აქამდე თავს არიდებდა“, – აღნიშნავს გამოცემა.
ევროკომისიის 20 მაისის პრესრელიზის თანახმად, თუ კიევს სესხიდან 8 მილიარდ დოლარზე მეტი თანხის მიღება სურს, მან უნდა გააუმჯობესოს შემოსავლების მობილიზება და უფრო ეფექტურად განკარგოს ფინანსები.
ეს განცხადება ზუსტად იმეორებს საერთაშორისო სავალუტო ფონდის არაპოპულარულ მოთხოვნებს, რომელთა შესრულებასაც ქვეყნის პარლამენტი აჭიანურებს, ხოლო ზოგიერთ შემთხვევაში დათქმულ ვადებს საერთოდაც გადააცილა.
ევროკომისიის განცხადებით, სესხის პირველი ტრანშის მისაღებად კიევს დასჭირდება ნაბიჯების გადადგმა ისეთი ციფრული პლატფორმებიდან მიღებული შემოსავლების დასაბეგრად, როგორიცაა Uber-ი, საჯარო ინვესტიციების სექტორული სტრატეგიების მიღება და საბაჟო კოდექსის განახლება.
განცხადების თანახმად, წარმატების შემთხვევაში, კიევი მიმდინარე წლის ივნისში პირველ, 3.2 მილიარდი ევროს ოდენობის პაკეტს მიიღებს. როგორც გამოცემა The Kyiv Independent-ის მიერ მანამდე მოპოვებული ევროკავშირის დოკუმენტებიდან ირკვევა, ეს ტრანში 8.35 მილიარდი დოლარის მოცულობის მიკროსაფინანსო დახმარების ნაწილია.